Kjo është udha e pazakontë drejt dijes e fëmijëve të fshatit Shkopet në Kurbin. Në mungesë të urës, ata përdorin një tip trapi, a lundre, për të vajtur në shkollë, dhe ku ritual i detyruar sakrifice vijon prej vitesh, më saktë shtatë.
Ura është shkatërruar nga prurjet rrëmbyeshme të lumit prej hapjes së portave të HEC-it të Shkopetit duke sjellë këtë problematikë për këta banorë, ku një pjesë e tyre janë larguar nga fshati vetëm nga mungesa e urës.
Ata që jetojnë ende aty, thonë se në stinën e dimrit prurjet e mëdha të lumit kanë rrezikuar dhe jetën e fëmijëve, hipur prej zorri në këtë lloj trapi të ndërtuar nga disa dërrasa dhe fuçi metalike.
Edhe në ditën e parë të shkollës, fëmijët e Shkopetit hipën mbi trapin e tyre të sajur nga halli për të mbërritur në vatrën e dijes.
Ministrja e Mbrojtjes Mimi Kodheli, ish-deputete e Qarkut të Lezhës premtoi rikonstruksionin e saj, por më kot. /tesheshi.com/
