Renditja e re e FIFA-s e ka pozicionuar përfaqësuesen e Shqipërisë në vend të 40-të. Një zbritje me tre vende për shkak të një miqësoreje me Luksemburgun të humbur në tavolinë.
Ndërkaq, Kosova, e cila sapo ka nisur të shkruajë historinë e saj në futbollin ndërkombëtar, renditet e 168-ta, por duke bërë një kërcim përpara me 22 vende. Një arritje e madhe, që i dedikohet dhe barazimit me Finlandën ditë më parë.
Po ku gjenden kundërshtarët e dy përfaqësueseve në eliminatoret e Botërorit të 2018-tës?
Kështu, rivalët e Shqipërisë në grupin G të eliminatoreve janë të pozicionuar si vijon në renditjen e FIFA-s: Spanjë është në vend të 11-të, Italia në vend të 13-të, Izraeli në vend të 98-të, Maqedonia në vend të 146-të, dhe Lihtenshtajni në vend të 182-të.
E sa për skuadrat përfaqësuese që gjenden në grupin I së bashku me Kosovën, renditja për to është: Kroacia e 14-ta, Turqia e 21-ta, Islanda e 27-ta, Ukraina e 29-ta, dhe Finlanda e 84-ta.
Renditjen botërore të FIFA-s e kryeson Argjentina, e ndjekur nga Belgjika, Gjermania, Kolumbia dhe Brazili. Dhjetëshen e parë e plotësojnë Kili, Portugalia, Franca, Uruguaji dhe Uellsi.
Renditja e re do të bëhet e njohur më 20 tetor. /tesheshi.com/
