Ushtria shqiptare dhe pjesëtarët e Forcës së Sigurisë së Kosovës gjatë këtij viti do të zhvillojnë stërvitje dhe trajnime të përbashkëta. Kjo është bërë e ditur sot pas takimit që zhvilluan dy ministrat, Mimi Kodheli dhe Haki Demolli në Tiranë, me ç’rast u firmos edhe plani i bashkëpunimit dypalësh për 2017-tën.
Situata e sigurisë në Kosovë dhe në veçanti në veriun e Mitrovicës, ishte temë kyçe e takimit. Këtë e konfirmoi në një konferencë për media ministrja Kodheli e cila tha se “konsolidimi i shtetit të Kosovës dhe paprekshmëria e kufijve kushtetues është në fakt prioritet i axhendës sonë të përbashkët dhe ishte, le të themi, ajo çka në mënyrë eksplicite u bisedua midis nesh dy delegacioneve”, njofton kumtesa e MFSK-së.
Kurse ministri Demolli falënderoi ministren Kodheli për përkrahjen që shteti shqiptar në vazhdimësi jep për paqen dhe sigurinë në Kosovë si dhe për zhvillimin dhe avancimin e Forcave të Sigurisë.
Megjithatë ministrat nuk kanë disktuar fare për transformimin e FSK-së në ushtri, të paktën referuar kumtesës së MFSK-së.
Në takim ndërkaq është folur për dyfishimin e numrit të ushtarakëve shqiptarë që janë pjesë e misionit të NATO-s në Kosovë, KFOR-it. /tesheshi.com/
