Fiter Bajrami në Shqipëri është kremtuar në orët e para të mëngjesit, duke përkuar, si askund në botë me ditën e votimeve.
Një pjesë e popullsisë, paralel u angazhua sa me faljen e sa me rendjen më pas drejt kutive të votimit. 25 qershori si datë zgjedhjesh ishte produkt i marrëveshjes mes Ramës dhe Bashës mesnatën e 18 majit, me synimin për t’u ruajtur afatet kushtetuese.
Por më pas u konstatua se kjo datë përkonte dhe me Fiter Bajramin, duke e kthyer këtë koinçidencë në diçka unike në historinë politike, fetare dhe sociale të Shqipërisë.
Fiter Bajrami i sotëm pati dhe një risi: faljen në sheshin e ri “Skënderbej”, një kthim pas më pak se 10 vitesh në këtë hapësirë.
“Bajrami është dita e lehtësimit të brengave, është dita e shpresave të reja, është dita e të kujtuarit për njëri-tjetrin, është dita për të gëzuar fëmijët me dhurata dhe përkëdhelje, është dita për të respektuar të moshuarit me mirënjohje dhe dashuri, është dita për t’u gjendur pranë të gjithë atyre njerëzve që presin interesimin dhe vëmendjen tonë”, tha në fjalën e tij, kreu i KMSH-së Skënder Bruçaj. /tesheshi.com/
