Qeveria shqiptare nënshkroi marrëveshjen e mirëkuptimit me kompaninë 4iG, për ndërtimin e një linje kabllore direkte nënujore midis Shqipërisë dhe Egjiptit.
Sipas kryeministrit Rama, ky është një projekt strategjik e inovativ që e kthen Shqipërinë në një nyje të ndërlidhjes ndërkontinentale.
“Ky projekt shënon një gur kilometrik në rrugën tonë drejt Shqipërisë 2030 dhe pa diskutim do të pasohet nga të tjerë projekte të përmasave dhe ambicies së këtij niveli që tanimë përkon me nivelin e ri në të cilin ndodhet vendi ynë”, tha ai.
Rama shpjegoi se rrjetet kabllore me fibër optike janë autostradat e komunikimit digjital dhe falë zbatimit të këtij projekti do të bëhet e mundur një lidhje ndërkontinentale nënujore, ku Shqipëria do të ketë një pozicion kyç në mundësimin e kësaj lidhjeje strategjike.
“Në pamje të parë projekti nuk ka shifra marramendëse, por në thelbin e vetë projekti është një projekt marramendës për nga impakti dhe për nga vlera që do të krijojë”, theksoi i pari i qeverisë. /tesheshi.com/
