Nga Blendi Gashi
Trafikimi i qenieve njerëzore ka qenë i njohur ndër shekuj, por tani është bërë pjesë e rëndësishme e rrjeteve kriminale dhe përfitimeve të shumta.
Viteve të fundit kjo dukuri negative në Kosovë është duke shënuar rritje me përmasa shumë shqetësuese.
Sipas të dhënave të Kombeve të Bashkuara, në të gjithë botën numri i fëmijëve të trafikuar çdo vit është 1 milion, dhe përfitimet që bëhen nga ky trafikim kapin shumën mbi 1.2 miliard euro.
Disa nga arsyet e trafikimit të fëmijëve konsiderohet që janë: varfëria, papunësia, dhuna në familje, lidhja ndërmjet pushtetit dhe grupeve kriminale, niveli i lartë i korrupsionit dhe keqpërdorimeve brenda sistemit të drejtësisë etj.
Nga studimet që janë bërë nga organizata të shumta për mbrojtjen dhe drejtat e fëmijëve, fëmijët të cilët janë të prekur nga trafikimi janë nga mosha 5 deri 18 vjeç, pastaj fëmijë me probleme sociale dhe të ardhura të ulëta, fëmijë që nuk kanë njërin prindër, ose kanë humbur që të dy prindërit dhe kanë mbetur pa kujdesin prindëror, fëmijë që kanë braktisur shkollimin, dhe sidomos trafikimi bëhet me fëmijë që janë nga komunitetet që nuk kanë të drejta të shumta në shtetin ku jetojnë.
Gjilani, komuna më e prekur nga trafikimi i fëmijëve
Policia e Kosovës ka konfirmuar për portalin tesheshi.com se dukuria e trafikimit të fëmijëveka shënuar rritje vitin 2015-të në krahasim me vitin 2014-të.
Zëdhënësi i policisë, Baki Kelani, ka bërë të ditur se në vitin 2014-të janë shënuar 172 raste të trafikimit të fëmijëve kurse në vitin 2015-të kjo dukuri ka shënuar rritje enorme pasi janë trafikuar 206 fëmijë.
Sipas të dhënave të policisë, qyteti i Gjilanit është më i prekuri nga kjo dukuri. Në vitin 2014-të në këtë komunë kanë ndodhur 69 raste të trafikimit të fëmijëve kurse më 2015-të 65 raste.
Pason komuna e Mitrovicës me 35 raste të ndodhura në vitin 2014-të dhe 46 raste një vit më pas.
Kryeqyteti, Prishtina renditet e treta, me 30 raste të shënuara më 2014-të dhe 32 më 2015-të.
Në Ferizaj, gjatë 2014-tës janë trafikuar 13 fëmijë, kurse më 2015-të janë rritur rastet pasi janë trafikuar 27 fëmijë.
Prizreni, është më pak e prekur nga kjo dukuri. Më 2014-të në këtë qytet në kufi me Shqipërinë janë trafikuar 19 fëmijë, kurse më 2015-të ka pasur ulje pasi janë shënuar veç 12 raste.
Në Mitrovicë të Veriut sipas statistikave të policisë janë trafikuar më së paku fëmijë. Më 2014-të kanë ndodhur 6 raste kurse një vit më vonë 8 raste.
Policia në përgjigjen e dërguar nuk ka dhënë statistika për komunën e Gjakovës.
Më 2015-të, 250 fëmijë të trafikuar
Statistikat e policisë tregojnë se pre e trafikimit më shumë janë fëmijët e gjinisë mashkullore të nacionalitetit shqiptar.
Më 2014-të janë trafikuar 86 fëmijë/meshkuj, derisa ka pasur rritje enorme të kësaj dukurie më 2015-të pasi numri është rritur në 134 raste.
Kurse, 90 fëmijë të gjinisë femërore janë trafikuar më 2014-të kurse më 2015-të është rritur numri në 116 raste.
Sa i përket nacionalitetit, është e kuptueshme se më së shumti janë trafikuar fëmijët shqiptarë të Kosovës ku më 2014-të janë shënuar 144 raste, kurse një vit janë shënuar 183 raste.
Nga komunitetet më së shumti janë trafikuar fëmijë serbë. 17 raste kanë ndodhur më 2014-të, kurse 19 më 2015-të.
Më pak fëmijë të trafikuar janë nga komuniteti rom, gjithësejt 9 në vitet 2014 – 2015.
Boshnjak gjithësejt 4 në dy vitet, ashkali 8 raste, egjiptian 6 raste dhe një rast nga komuniteti turq.
Të gjithë fëmijët e trafikuar janë të moshës deri në 18 vjeç. /tesheshi.com/
