Pirja e duhanit shkakton 1/10 e vdekjeve në botë. Pavarësisht nga dekada të fushatave kundër pirjes së duhanit, për shkak të rritjes së popullsisë është rritur dhe numri i duhanpirësve, thonë ekspertët.
Vdekshmëria mund të rritet edhe më shumë, pasi industria e duhanit po reklamon cigaret në mënyrë gjithnjë më agresive nëpër tregje të reja, veçanërisht në vendet në zhvillim, raporton BBC.
“Pavarësisht faktit se për më shumë se gjysmë shekulli gjithë ne dijmë për efektet e dëmshme të pirjes së duhanit mbi shëndetin tonë, sot çdo i katërti banor është duhanpirës”, thotë dr. Emmanuela Gakidou, autori kryesor i studimit të publikuar në revistën mjekësore Lancet.
“Pirja e duhanit është faktori i dytë më i madh i rrezikut për vdekjet e parakohshme ose invaliditetin, andaj për të ulur efektet e dëmshme të duhanit duhet të forcohet edhe më shumë kontrolli ndaj duhanit”, shton ajo.
Studimi është bazuar në shprehitë e duhanpirësve në 195 vende të botës midis viteve 1990 dhe 2015. Ekspertët kanë zbuluar se në vitin 2015 gati një miliard njerëz ka tymosur çdo ditë, çdo i katërti mashkull dhe çdo e njëzeta grua. Kjo megjithatë është më pak se në vitin 1990, kur ka tymosur çdo i treti mashkull dhe dhe çdo e dymbëdhjetë grua. Megjithatë, rritja e popullsisë botërore ka çuar në një rritje të numrit të duhanpirësve, me 870 milionë në vitin 1990. Ndërkohë, numri i vdekjeve të shkaktuara nga pirja e duhanit, më shumë se 6,4 milion në vitin 2015, është rritur në të njëjtën periudhë për 4.7 për qind, thonë studiuesit.
Disa vende kanë arritur të largojnë njerëzit nga pirja e duhanit, kryesisht përmes një kombinimi të taksave të larta, paralajmërimeve në paketime të duhanit dhe përmes edukimit. Në periudhën prej 25 vjeteve, Brazili ka reduktuar numrin e duhanpirësve për 29 në 12 për qind në mesin e meshkujve dhe prej 19 për qind deri në 8 për qind në mesin e grave. Por situata në Bangladesh, Indonezi dhe Filipine nuk ka ndryshuar nga viti 1990 deri në vitin 2015. Në Rusi, gjatë kësaj periudhe numri i duhanpirësve është rritur katër për qind; një situatë të ngjashme dominon edhe në ekonomitë me rritje të shpejtë në Afrikë, paralajmërojnë shkencëtarët. /tesheshi.com/
