Më shumë se 320,000 njerëz në Britaninë e Madhe u trajtuan për kancer vitin e kaluar, një rekord i ri kombëtar, njoftoi të martën Shërbimi Shëndetësor Britanik.
Shërbimi Kombëtar i Shëndetit (NHS) tha se midis nëntorit 2021 dhe tetorit 2022, më shumë se 320,000 pacientë u trajtuan për kancer, numri më i lartë i regjistruar ndonjëherë. Krahasuar me të njëjtën periudhë para pandemisë, numri i pacientëve u rrit me 8000.
Thuhet se është numri më i madh ndonjëherë i njerëzve që i nënshtrohen kontrolleve të NHS që mund të shpëtojnë jetën.
“Më shumë se 2.8 milionë njerëz kanë pasur një kontroll parandalues të kancerit, që është pothuajse një e pesta më shumë se në të njëjtën periudhë përpara pandemisë COVID-19”, sipas NHS.
NHS gjithashtu deklaroi se më shumë se 10,000 njerëz kontrollohen për kancer çdo ditë, me rreth gjashtë për qind që rezulton në një diagnozë malinje.
Dame Cally Palmer, drejtore e NHS Cancer England, tha se stafi shëndetësor kishte “punuar jashtëzakonisht shumë gjatë vitit të kaluar për t’u rikuperuar nga pandemia”.
Ajo theksoi rëndësinë e ekzaminimeve parandaluese, kontrolleve të rregullta dhe ftoi ata që kanë simptoma dhe shqetësime të mundshme të aplikojnë për ekzaminime. /tesheshi.com/
