Dukuria e braktisjes së fëmijëve në Kosovë ka vazhduar edhe këtë vit, ku në periudhën janar-mars janë braktisur gjashtë.
“Gjatë tre mujorit të parë të këtij viti në Klinikën e Gjinekologjisë kanë qenë 6 fëmijë të braktisur, përderisa 5 nga ta janë marrë për bashkim familjar, nga prindërit biologjikë të tyre. Ndërsa një është në SOS Fshatin e Kosovës”, është shprehur Mirlinda Qyqalla,zyrtare për informim në QKUK.
Ajo ka shtuar se mosha e nënave që braktisin fëmijët është kryesisht e re por që nuk janë të mitura.
“Rastet janë nga vendet rajonale ndërsa mosha e nënave të tyre janë kryesisht të reja, por që janë mbi moshën 18 vjeçare. Aktualisht nuk ka asnjë fëmijë të braktisur në Klinikën e Gjinekologjisë”, ka thënë Qyqalla, për portalin “Arbresh.info”.
Ndërkaq, krahas nivelit të fëmijëve të braktisur ekziston edhe interesim i lartë i çifteve në Kosovë që të adoptojnë fëmijë të tillë.
Zëdhënësi për informim në Ministrinë e Punës dhe Mirëqenies Sociale, Musa Demiri ka bërë të ditur se për tre mujorin e parë në nivel tëvendit janë evidentuar rreth 104 kërkesa për adoptim.
“Në bazë të regjistrit gjeneral, bazuar në raportin e fundit të tremujorit të parë të këtij viti janë në evidencë rreth 104 kërkesa, gjegjësisht familje potenciale adoptuese në nivel vendi”, ka thënë Demiri.
Ai ka thënë se mosha e fëmijëve që familjet dëshirojnë t’i adoptojnë sillet nga 0 deri në 5 vjeç.
Ndërsa organizata SOS Fshatrat e Fëmijëve ka thënë se kujdesi i tyre për fëmijët e braktisur është afat gjatë dhe se qëllimi i tyre është që këtyre fëmijëve tu ofrojmë familje që të mund të ndërtojnë të ardhmen e tyre. /tesheshi.com/
