Ikja e kosovarëve nga vendi i tyre është bërë kryelajm për mediat vendore dhe shqetësimi nuk mund të fshehet më.
Ndonëse rrugët pranë ambasadave mbushen qysh me të zbardhur dita, ato te stacionet e autobusëve janë më të mbushura gjatë natës, kur udhëtimi është më i shpejtë dhe më i qetë.
Dëshmitë për bankat shkollore të boshatisura qarkullojnë nëpër rrjetet sociale, ashtu siç po qarkullon edhe kjo ftesë e një vogëlusheje ku shkruan:
“Lediana! Je e mirëpritur në festën time të lamtumirës, në ora 2:00, 11 Prill.”
Një ftesë lamtumire për ta shijuar për herë të fundit shoqërinë e klasës, dhe me gjasë për të mbyllur dhe ruajtur një herë e mirë kujtimet e fëmijërisë në vendlindje, nuk është gjë tjetër veçse alarm.
Por letra zemërthyese me gjasë nuk është alarm i mjaftueshëm për institucionet, kreu i të cilave si me ironi deklaroi dje se “është e natyrshme që të kërkohët një punë më e mirë”. /tesheshi.com/
