Siguria në kullën e Aviacionit tek aeroporti Ndërkombëtar i Prishtinës është rikthyer përsëri në duart e ndërkombëtarëve. Pas 10 vitesh forcat e KFOR-it do të rikthehen tek ky vend, shkruan “Indeksonline”.
Sipas medias në fjalë, komandanti i KFOR-it, Giovanni Fungo ka zhvilluar një takim me zyrtarët e aeroportit dhe iu ka kërkuar që ushtarët e tij të kthehen përsëri për arsye të gjendjes së sigurisë.
Por, një gjë e tillë është hedhur poshtë nga Autoriteti i Aviacionit Civil i Kosovës, duke thënë se nuk ka asnjë shqetësim sa i përket sigurisë së shërbimeve nga Agjencia e Shërbimeve të Navigacionit Ajror.
Vlen të theksohet se disa prej ambasadorëve të huaj në Kosovë po zgjedhin rrugë tjera për të udhëtuar për në vendet e tyre. Ata po refuzojnë ta bëjnë një gjë të tillë përmes aeroportit “Adem Jashari” për shkak të ngjarjeve të fundit.
Vitin e kaluar një test i sigurisë që ishte bërë në aeroportin e Prishtinës vuri në dukje mungesa të mëdha në aspektin e sigurisë. /tesheshi.com/
