Ndër problemet kryesore në Ballkanin Perëndimor për momentin, sipas vlerësimit të anëtares së Komisionit për Politikë të Jashtme të Senatit Amerikan, Jeanne Shaheen, janë marrëdhëniet mes Serbisë dhe Kosovës, qeveria e re e Malit të Zi e mbështetur nga proserbë dhe krahu i djathtë pro-rus, lideri i të cilit Andrija Mandiç u zgjodh kryetar i parlamentit, si dhe retorika e liderit serb të Bosnjës Milorad Dodik, i cili mbron rishikimin e kufijve shtetërorë në Ballkanin Perëndimor.
Në një intervistë me Zërin e Amerikës, Shaheen tha se ajo “ndan absolutisht shqetësimin” për strukturën e re qeverisëse në Mal të Zi dhe mundësinë që “dikush në Mal të Zi të ndajë me presidentin rus Vladimir Putin atë që po ndodh në NATO”.
Duke folur edhe për thirrjet e Milorad Dodik, i cili tha se entiteti boshnjak Republika Srpska, Serbia dhe Mali i Zi duhet të bashkohen në një shtet, Shaheen tha se është e nevojshme të vazhdohet me inkurajimin e Bashkimit Evropian për të vendosur sanksione ndaj Dodikut.
“Deri më tani, ata kanë hezituar të ndërmarrin atë hap,” tha Shaheen.
“Duhet ta ndëshkojnë edhe ashpër. Zyra e Përfaqësuesit të Lartë duhet të vazhdojë të merret me përpjekjet e Dodikut për të minuar Marrëveshjen e Dejtonit”, tha ajo.
Shaheen shprehu shpresën se Kongresi do të miratojë projektligjin e saj të ri për Ballkanin Perëndimor, i cili mbështetet nga të dyja palët.
“Propozimi parasheh shumë gjëra. Një prej tyre është se sanksionet bëhen pjesë e ligjit. Deri më tani ato parashikoheshin me dekrete dhe u referoheshin zyrtarëve të korruptuar në Ballkanin Perëndimor. Ai parashikon gjithashtu asistencë teknike në zbatimin e reformave demokratike, dhe një pjesë e madhe merret me aktivitetet tregtare dhe ekonomike, gjë që është shumë e rëndësishme. Ka edhe një pjesë që parashikon mbështetje për liderët e rinj në Ballkanin Perëndimor”, shtoi ajo. /tesheshi.com/
