Kështu e ka përkufizuar David Miliband, ish-sekretari i Jashtëm britanik, gjestin e Sacha Baron Cohen-it dhe të bashkëshortes së tij, që dhurojnë një milion dollarë për refugjatët sirianë: “Shprehje e madhe e njerëzisë!”
Komediani britanik dhe e shoqja, aktorja Isla Fisher, do t’i japin organizatës Save the Children 500.000 dollarë për të paguar vaksinimet nga fruthi për fëmijët sirianë në veri të vendit të përfshirë prej vitesh nga lufta.
Po kaq japin ata për një tjetër organizëm, për Komitetin Ndërkombëtar të Shpëtimit (IRC), për t’i ndihmuar refugjatët, si ata të shpërngulurit brenda Sirisë, po ashtu edhe ata në vendet fqinje, me kujdes të treguar më së tepërmi për fëmijët e gratë.
Ndërsa në emër të IRC-së do të shprehej Miliband-i për bamirësinë, për organizatën Save the Children ka folur shefi ekzekutiv i saj, Justin Forsyth, që ka pohuar se shuma e dhuruar do të “shpëtojë mijëra njerëz dhe ka për t’i mbrojtur ca prej fëmijëve më të pambrojtur”. /tesheshi.com/
