Presidenti francez Emmanuel Macron ka paralajmëruar se miliarda euro nga paratë e taksapaguesve të shpenzuara në buxhetet ushtarake evropiane nuk duhet të përdoren për të blerë vetëm armë amerikane, duke i mëshuar kështu investimeve më të mëdha në industrinë vendase të mbrojtjes, raporton Reuters.
“Ne nuk mund të rrisim kolektivisht borxhin, të shpenzojmë më shumë për mbrojtjen tonë për të subvencionuar industrinë, pasurinë dhe vendet e punës në kontinente të tjera. Kur themi ‘shpenzoni më shumë për ushtritë tona’, në shumë vende kjo shumë shpesh do të thotë ‘bleni më shumë materiale amerikane’,” tha ai në një fjalim drejtuar udhëheqjes ushtarake franceze.
Armët amerikane në vend të atyre evropiane
Franca, e cila ka një industri të madhe ushtarake, shpesh është ankuar kur anëtarët e tjerë të Bashkimit Evropian kanë vendosur të blejnë armë amerikane kur ka alternativa franceze ose evropiane. Vendimi i Gjermanisë në vitin 2022 për të nisur sistemin e mbrojtjes ajrore “European Sky Shield” me pajisje amerikane dhe izraelite, duke injoruar alternativën franko-italiane, zemëroi veçanërisht Macron.
Vendet që janë mbështetur në ombrellën e sigurisë amerikane që nga Lufta e Dytë Botërore prej kohësh e kanë hedhur poshtë këtë shqetësim si egoizëm.
Macron tha se evropianët duhet gjithashtu të modernizojnë industrinë ushtarake evropiane. Evropa ka 47 platforma të ndryshme industriale për industrinë e saj detare, ndërsa SHBA ka vetëm gjashtë, thotë ai.
Ai bëri thirrje për një zhvillim më të madh të përbashkët evropian të armëve, edhe pa kompanitë franceze në krye, duke shtuar: “Ne nuk do të jemi gjithmonë kampionë evropianë. Por të paktën do të jemi të sigurt që kampionët evropianë kanë një shtrirje globale”.
Çështja e sfidës ruse ndaj Evropës
Macron tha se Franca tani ka “ushtrinë më efektive evropiane” dhe ka përmbushur objektivin e NATO-s për një buxhet ushtarak prej dy përqind të PBB-së, por ajo nuk mund të “flejë mbi dafina” në një kohë kur SHBA mund të tërheqë trupat nga Evropa.
Ai sugjeroi se dy për qind mund të mos jenë të mjaftueshme “kur bota del jashtë rrugës”. Macron tha gjithashtu se Rusia do të përbëjë një sfidë sigurie për Evropën dhe botën për një kohë të gjatë, edhe nëse lufta në Ukrainë përfundon, të cilën Trump premtoi t’i jepte fund brenda 24 orëve pasi u bë president.
“Mos tallemi, ky konflikt nuk do të zgjidhet nesër, as pasnesër”, tha lideri francez, duke shtuar se paqja në Evropë kërkon që evropianët të jenë në tryezën e bisedimeve. /tesheshi.com/
