Një shqiptar është kthyer në hero, pasi ka shpëtuar një vajzë të mitur 2-vjeçare nga dhuna e nënës së saj.
Mediat austriake shkruajnë se 21-vjeçari Elvis Kadriu, ka qenë duke kaluar me makinën e tij në sheshin Braunau kur ka parë skenën e tmerrshme, sesi një grua po dhunonte në mënyrë çnjerëzore një fëmijë të mitur që vetëm qante dhe ulërinte. Kadriu ka ndalur makinën dhe ka ndërhyrë duke marrë në mbrojtje vogëlushen.
“Skenat që kam parë ende më kanë mbetur në kokë. Nuk mundem të besoj se si një nënë mund të sillet në atë mënyrë ndaj fëmijës së saj. Unë isha duke u kthyer me makinë nga shtëpia e tezës sime”, ka thënë Elvisi, duke shtuar se ajo ishte aq e dehur sa që nuk arrinte të qëndronte as në këmbë.
Policia ka arrestuar nënën 42-vjeçare dhe vajza e vogël është dërguar në spital. /tesheshi.com/
