Ata janë tre fëmijë fatkeqë. Mateo 12 vjeç, Jozefi 10 dhe Renata vetëm 5 vjeç e gjysmë, kanë mbetur pa prindër, si pasojë e një tragjedie në familje, ku i ati iu vrau nënën, Valbonën 27 vjeçe, e tani ndodhet në burg, ngjarje kjo e ndodhur tre vite më parë në Mamurras.
Të tre fëmijët tashmë kanë për prindër gjyshërit e tyre, tek të cilët kanë gjetur strehë, ushqim e përkujdesje.
Dy djemtë, Mateo dhe Jozefi janë në dijeni për ngjarjen, ndërsa vajza Renata – dhe këtu dhe dhimbja tjetër – nga paaftësia mendore nuk ka arritur të njohë asnjërin nga prindërit, e natyrisht as të kuptojë se çfarë ka ndodhur me ta.
Sepse 5-vjeçarja vuan nga sëmundja me sindromin Down. Dhe kjo po i rëndon më së shumti gjyshërit, prindërit e nënës biologjike.
Vitori dhe Tale Gjokeja tashmë kujdesen tamam si prindër për tre fëmijët e mbetur pa nënë e baba. Por barra më e madhe e tyre është e vogla e sëmurë.
Deri më tani, ata nuk ia kanë shtrirë dorën askujt, por sëmundja e vajzës i detyron që të kthejnë sytë nga shteti. Nuk kërkojnë asgjë tjetër veç sigurimit të Renatës në një qendër sociale ku ajo mund të rehabilizohet nëse i ofrohen mundësitë e trajtimit me punonjës socialë.
Tale, gjyshja thotë se për shkak të sëmundjes, kanë shumë vështirësi në trajtimin e mbesës, ndaj dhe apelon që shteti të mund t’i ofrojë një zgjidhje, që do ishte pra qendra sociale, aty ku mund të marrë dhe trajtim.
Është një dramë e papërshkrueshme, që këkon njerëz me zemër të madhe, sidomos nëse janë shtetarë e me përgjegjësi. /tesheshi.com/
