Një javë pas zgjedhje, e vemja forcë politike në Shqipëri që ka një kontestim konkret rezultati, është PDIU-ja e Idrizit. Me këtë parti ka ndodhur një precedent i rrallë, ku tre deputetë që ka nxjerrë nuk kanë ndonjë lidhje të drejtpërdrejtë me identitetin apo kauzën çame.
Madje në dy raste, mandatet janë të lidhur me elementin e “të fortëve” në politikë. Vetë Idrizi si dhe figura tjetër më imponuese, Mesila Doda, një zë potent në politikën shqiptare, mbetën jashtë. Por Idrizi, i cili nuk arriti të dalë fitues dhe në një zonë me dominancë çemërish, siç është Rrogozhina, pretendon në mandatin po ia heq padrejtësisht KQZ-ja.
“Anëtari i KQZ-së, Bledar Skënderi, deklaroi sot se PDIU nuk e merr mandatin në Tiranë për 0.01 përqind. Ky është rasti kur anëtari i KQZ sillet si militant partie, dhe jo si komisioner e administrator i
procesit.
Ne po presim verifikimin e të gjithë procesverbaleve dhe rezultatin përfundimtar për të bërë me dije pozicionin tonë ligjor dhe në gjithë informacionet që ne kemi, ky është mandati i PDIU-së.
Anëtari i KQZ nuk ka as durimin më minimal të presë dhe rezultatet zyrtare të vetē KQZ, që ka 5 ditë që nuk i hedh të gjithë të dhënat në sistem.
Kemi pritur deri tani certifikimin e të dhënave sipas procesverbaleve, proces i cili ka nisur me korrektësi, sipas Kryetarit të KQZ.
PDIU dënon deklaratet e anëtarit të KQZ që prononcohet pa dalë rezultatet e vetë KQZ.
I kujtojmë që është vendosur në atë post nga një parti politike, por për të administruar vetëm sipas Kodit Zgjedhor, votat e shqiptarëve.
I bëjmë thirrje KQZ të mos sillet si trupë partiake, por si administratorë të betuar për administrimin e votave të shqiptarëve bazuar vetëm në Kodin Zgjedhor”, thuhet në një deklaratë të fundit të Idrizit.
Ndërkohë, si për ironi të fatit, në parlament do jetë armiku i tij etno-politik, Vangjel Dule, pas marrjes së mandatit të të cilit, Tciprasi i përcolli një urim të ngrohtë Ramës për fitoren në zgjedhje, duke e mikluar me fjalë të zgjedhura për marrëdhënie të mira mes fqinjësh.
Ironi përbën dhe fakti se figura kryesore e PDIU-së në parlament, do jetë Afiq Rakipi, i njohur ndryshe si “Qifi” nga vetë goja e Idrizit. Vërtet një moment i sikletshëm për të, që në parlament të jetë si Dule e si Qifi, dhe jo ai. /tesheshi.com/
