Eshtë përcaktuar shkaku i incidentit të ndodhur fillimin e kësaj jave me një avion të kompanisë ajrore Daallo Airlines, i cili do të bënte ulje të detyruar vetëm pak minuta pasi ishte ngritur nga aeroporti i Mogadishos për shkak të një shpërthimi dhe të një vrime të hapur në të.
Autoritetet somaleze kanë dalë në përfundimin se atë e shkaktoi një bombë, ndërsa fillimisht qe menduar për probleme teknike. “Hetimet shtesë të kryera nga ekspertët somalezë dhe ndërkombëtarë kanë konfirmuar se shpërthimi që ndodhi brenda avionit të Daallo Airlines-it nuk ishte një problem teknik, por një bombë, me të cilën synohej të shkatërrohej avioni dhe të vriteshin të gjithë pasagjerët në të,” ka deklaruar në një konferencë shtypi ministri somalez i Transportit dhe i Aviacionit.
Siç mësohet, forcat e sigurisë kanë arrestuar një numër personash të dyshuar për vendosjen e bombës brenda avionit.
Shpërthimi këtë të martë në avionin Airbus ngjau 15 minuta pas ngritjes nga aeroporti i kryeqytetit somalez, ndërsa ai qe drejtuar për në Xhibuti, dhe hapi një vrimë të madhe në njërën anë të tij. Me sistemin e pilotimit të padëmtuar, piloti arriti të bënte ulje të detyruar.
Nga shpërthimi humbi jetën një pasagjer, i nxjerrë jashtë avionit me sa duket, ndërsa dy të tjerë u plagosën lehtë. /tesheshi.com/
