Mensur Krasniqi
Koalicioni qeverisës në Maqedoni i përbëra nga VMRO-DPMNE dhe BDI së fundmi ka hasur në kritika të ashpra edhe nga kryetari i qytetit të Prishtinës, Shpend Ahmeti.
Ai mezi shpëtoi kokën e gjallë i sulmuar nga tifozeria e klubit të futbollit Vardar në stadiumin e qytetit të Shkupit. Në një ndeshje mjaft interesante të disa xhirove para fundit të sezonit, ishte i ftuar si mysafir special nga klubi shqiptar i Shkëndisë, mirëpo i njëjti së bashku me tërë kryesinë e këtij klubi dhe anëtarë të Federatës së Futbollit të Maqedonisë ishin objekt sulmi dhe fyerjeve të tifozerisë nacionaliste të klubit Vardar, “Komitët”.
Pas kësaj ndeshje Shpend Ahmeti ka shprehur revoltin ndaj përfaqësuesve shqiptar në qeveri duke e cilësuar si shumë të dobët dhe pa kërkesa parimore për të mbrojtur diskriminimin e shqiptarëve në përgjithësi.
Ja dhe statusi i plotë i Shpend Ahmetit në facebook:
“Jam i vetëdijshëm që huliganë të futbollit ka kudo në botë.
Megjithatë, ajo që nuk mund të tejkalohen jane dy gjëra:
1. Urrejtja ndaj shqiptarëve është në maksimum dhe në situata të tilla shpërfaqet e pastër.
2. Përfaqësimi shqiptar në Maqedoni është në gjendje shumë të dobët. Koketimi i partive tona për qeveri pa kërkesa të qarta dhe parimore të shqiptarëve do të sjellë më shumë diskriminim dhe urrejtje ndaj shqiptarëve e jo vetëm në ndeshje futbolli.
Unë mund të jem atje vetëm disa orë, një herë në dy tre muaj, por shqiptarët e Maqedonisë atje jetojnë në kushte të tilla gjatë tërë vitit, brenda e jashtë stadiumit.”
Nga ana tjetër edhe klubi futbollistik Vardar e dënon ashpër huliganizmin që ndodhi në tribunat e stadiumit nacional “Filipi i Dytë”. Mirëpo në ndërkohë ndjehen krenar që nuk kanë lejuar asnjë nga anëtarët e kryesisë së Shkëndisë të jetë i lënduar nga sulmet e tifozëve, për dallim nga organizimet që bënë klubet kundërshtare të shqiptarëve si Shkëndija dhe Shkupi.
“Jemi krenar që të gjithë të pranishmit nga tabori kundërshtar në mënyrë të sigurtë dhe me dinjitet i larguam nga e gjithë ajo situatë, për dallim nga ajo që neve na ka ndodhur në stadiumet ku ne ishim si mysafir të Shkëndisë dhe të Shkupit në Çair. Sa për përkujtim, në këto dy ndeshje në kuadët të xhiros së dytë, gjegjësisht të xhiros së 24, një orë të plotë pas përfundimit të ndeshjes, së bashku me futbollistët tanë, ishim të fyer dhe nënçmuar me lloj lloj etiketime të bazës nacionale”, thonë nga klubi futbollistik Vardar.
Ndryshe ndeshja ndërmjet Vardarit dhe Shkëndisë së Tetovës ka përfunduar me rezultat 1:1. Ekipi Vardarit është në vendin e parë në tabelë me dy pikë më shumë se Shkëndija e Tetovës disa xhiro para përfundimit të sezonit. /tesheshi.com/
