Policia e Londrës po zhvillon hetime në lidhje me shpërthimin e ndodhur në metro, ku nga raportimet konfirmohen rreth 20 të plagosur, mes të cilëve dhe fëmijë.
Autoritetet thanë se “është shumë herët të konfirmohet” shkaku i shpërthimit, ndërsa hetimet janë shtrirë edhe në pistën e një incidenti terrorist.
Fillimisht, mediat britanike kanë raportuar se një zyrtar policor ka thënë se një pajisje e dyshuar shpërthyese nuk është aktivizuar plotësisht.
Një dëshmitar i ka thënë agjencisë Reuters se ai ishte në metro në stacionin Parson Green, kur ka dëgjuar shpërthimin dhe ka parë një veturë afër tij të përfshirë në zjarr.
Dyshimet janë që bomba që shpërtheu ishte e ndërtuar në mënyrë artizanale.
Nga fotografitë e shpërndara në rrjet shihet një qese plastike, që ka brenda një kuti me disa drita si ato të zbukurimeve për Krishtlindje. Ekspertët e eksplozivëve thonë se bomba e Parsons Green mund të kishte vrarë dhjetëra njerëz nëse ajo kishte shpërthyer siç duhet.
Policia po heton mbi bombën që nuk arriti të shpërthente plotësisht në stacionin e metrosë në perëndim të Londrës dhe përpiqet të kapë autorin.
Dëshmitari Sylvain Pennec tha se: “ajo dukej si një kovë me majonezë. Nuk jam i sigurtë nëse ishte një reagim kimik apo diçka tjetër. Autorët kanë tentuar të përdorin dritat e pemës së Krishtlindjes si ndihmë për shpërthimin, po ashtu ekspertët thonë se kjo pajisje ishte artizanale”.
Gjenerali Chip Chapman tha për Sky News se : “kjo nuk duket si një eksploziv si ato të sulmeve terroriste, por nëse do të ishte, ai dështoi në mënyrë të konsiderueshme”.
“Nuk është një eksploziv që funksiononte, në të kundërt shpërthimi do të kishte vrarë njerëz të shumtë”, tha ai.
Sipas tij, po hetohet nëse ndonjë grup, qoftë edhe terrorist do të marrë përsipër ose jo sulmin. /tesheshi.com/
