Policia e Tiranës vijon hetimet për të zbardhur ngjarjen e ndodhur dy ditë më parë, ku një sasi ekslozivi shpërtheu në makinën tip “Hummer” të presidentittë ekipit të Kamzës, Naim Qarri.
Burime nga policia bëjnë të ditur se po hetojnë në pistën e borxheve që Qarri mund të ketë, edhe pse ky i fundit ka mohuar plotësisht një gjë të tillë, apo që ka konflikte me ndonjë person.
Oficerët e policisë kanë marrë në pyetje sërisht presidentin e ekipit të Kamzës, sikundër disa dhjetra persona janë thirrur për të dhënë dëshmitë e tyre.
Burimet thanë se të gjithë personat e pyetur, përfshirë edhe vetë pronarin e mjetit, kanë deklaruar se nuk kanë parë asnjë person të dyshimtë para apo pas ngjarjes. Nga ana tjetër, në zonën nuk është gjetur asnjë kamera sigurie, që mund të ndihmonte grupin hetimor për identifikimin e autorit.
Pavarësisht se aktivizimi i tritolit është bërë nga afër me fitil, autori nuk është parë nga askush, as kur i është afruar mjetit dhe as kur është larguar pasi ka ndezur fitilin.
Ngjarja ndodhi mbrëmjen e së hënës në zonën e Bathores në Tiranë. Fatmirësisht nga shpërthimi nuk ka pasur persona të lënduar, pasi automjeti tip “Hummer”, ka qenë i parkuar, në momentin kur është aktivizuar lënda plasëse, shkruan Panorama.
Në kohën kur ndodhi ngjarja, Qarri ndodhej në lokalin pranë të cilit e kishte parkuar makinën. Sapo është ndjerë shpërthimi, të gjithë personat që ndodheshin në lokal kanë dalë jashtë për të parë se çfarë kishte ndodhur e më pas kanë lajmëruar Policinë.
Burime nga grupi hetimor thanë se paraprakisht dyshohet se bëhet fjalë për një sasi të vogël eksplozivi, rreth 150 gram tritol që ka shpërthyer në pjesën e përparme të mjetit. /tesheshi.com/
