Policia e Shtetit ka reaguar pas deklaratave të forta që bëri sot presidenti i zgjedhur Ilir Meta.
Ish-kreu i LSI-së nga Lezha, teksa vizitoi kryeplakun e dhunuar, dhe njëherësh mbështetësin e LSI-së, u shpreh se “populli do armatoset, nësë policia nuk i kap këta zagarë”.
Lidhur me këtë shpërthim të Metës, policia ka reaguar me anë të një deklarate për media ku shpreh “keqardhje për sulmin nga ana e një lideri politik’.
Sipas Policisë së Shtetit, “pretendimet e personit të goditur po vazhdojnë të hetohen, por nuk ka asnjë provë për prapavijën politike të incidentit”.
Reagimi i Policisë së Shtetit
Keqardhje për sulmin e sotëm mbi Policinë e Shtetit nga ana e një lideri politik, lidhur me incidentin e ndodhur në Lezhë. Ashtu sikundër e ka komunikuar me transparencë të plotë më parë, Policia e Shtetit përsërit se ka kryer të gjitha veprimet hetimore dhe nuk ka asnjë provë për prapavijën politike të incidentit.
Pretendimet e personit të goditur po vazhdojnë të hetohen. Por mbetet fakti që në deponimin e tij ai ka folur për persona të panjohur dhe nuk ka raportuar asgjë konkrete që të ngrihet dyshimi i arsyeshëm se incidenti është i motivuar politikisht.
Policia e Shtetit do të vazhdojë të kryeje me përgjegjshmërinë më të lartë profesionale detyrën e saj kushtetuese e ligjore dhe u bën thirrje të gjitha subjekteve e liderëve politikë të shmangin çdo përfshirje direkte ose indirekte të Policisë së Shtetit në retorikën e tyre elektorale./tesheshi.com/
