Xhemil Radun, komandanti i një fraksioni rebel sirian të lidhur me Ushtrinë e Lirisë Siriane, humbi jetën pasi një bombë e vënë në makinën e tij shpërtheu ndërsa ai bëri ta ndizte atë. Ngjarja ndodhi në provincën Hataj, në jug të Turqisë dhe në kufi me Sirinë.
44-vjeçari u rezistoi plagëve për pak kohë, por ndërroi jetë pasi u dërgua në spital. Raduni ishte komandant i brigadës Shukur el-Gap, të përbërë nga 2.000 trupa rebele që luftojnë prej kohësh regjimin e Beshar Esadit. Bomba ishte vënë poshtë makinës së tij, pikërisht në anën e shoferit.
Ai i pati shpëtuar dhe një atentanti të ngjashëm në prill të këtij viti, kur në makinën e tij u gjet një bombë ndërsa ai po qëndronte në Rejhanllë, po në jug të Turqisë. Asokohe bomba u shpërthye nga njësia policore e specializuar për zgjidhjen e situatave të tilla. Komandanti sirian e kishte bërë të qartë se dyshonte diku, por pa dhënë emra.
I ndjeri pati shërbyer më herët si nënkolonel në ushtrinë siriane, për të kaluar më pas në radhët e kundërshtarëve të regjimit. Sipas prefektit të Hatajit, hetimet e para kanë treguar se atentati mund të jetë kryer nga një fraksion rival brenda opozitës siriane.
Provincat turke në kufi me Sirinë janë kthyer shpesh në arena të incidenteve të tilla. Lufta civile përtej kufirit ka sjellë pasiguri në anën turke, përpos miliona të ikurve nga Siria që kanë gjetur strehë në Turqi. /tesheshi.com/
