Së paku 11 shpërthime i goditën pesë provinca jugore të Tajlandës diçka më tepër se një ditë më parë, duke lënë të vdekur katër persona dhe duke plagosur dhjetëra të tjerë, mes të cilëve dhe të huaj.
Por policia tajlandeze ka hequr dyshim mbi natyrën e shpërthimeve që i tronditën destinacionet turistike në jug të vendit, duke i cilësuar ato si sabotime lokale, e jo si akte terroriste.
Zëvendëszëdhënësi i policisë kombëtare, Piyapan Pingmuang, do t’u deklaronte gazetarëve në Bangkok se, “Ky nuk është një sulm terrorist. Eshtë vetëm sabotim lokal, i shtrirë në zona dhe provinca të kufizuara.”
Zëdhënësi i ka hedhur poshtë zërat se pas sulmeve gjendeshin rebelët muslimanë që po kryenin një rebelim në jugun e largët të vendit. “Eshtë ende e paqartë se cili grup është pas shpërthimeve,” ka thënë ai.
Mediat lokale lajmëruan dhe për një numër zjarresh gjatë orëve të fundit në jugun tajlandez, por nuk mund të thuhet nëse ato kanë lidhje me shpërthimet.
Një njoftim i policisë së Tajlandës u ka kërkuar punonjësve të saj të shtojnë sigurinë në objektet shtetërore dhe në vendet ku mblidhen një numër i madh njerëzish, si në stacionet e autobusëve, në ato të trenave, në aeroporte, në vende turistike, në restorante e në vende argëtimi. /tesheshi.com/
