Pas një qetësie relative, Stambolli është tronditur rishtas sot nga një shpërthim në orët e para të mëngjesit.
Shpërthimi ka ndodhur në Veznexhiler, një zonë në Bejazit, tejet e populluar dhe me aktivitet.
Objektivi kanë qenë makinat e forcave të ndërhyrjes së shpejtë. Shpërthimi ka ndodhur gjatë kalimit të njërës prej tyre, pas të cilit janë dëgjuar dhe të shtëna armësh.
Deri tani njoftohet për pesë policë të plagosur, njëri prej të cilëve është në gjendje të rëndë. Ende nuk dihet mënyra e kryerjes së shpërthimit, por dyshimet më të mëdha janë për një makinë me lëndë shpërthyese të parkuar në zonë. Shpërthimi ngjan të jetë kryer i telekomanduar.
Nuk ka asnjë informacion se kush mund ta ketë kryer shpërthimin, siç nuk ka ende një deklaratë zyrtare.
Makina të shumta zjarrfikëse e autoambulanca ka në hapësirën ku ndodhi shpërthimi.
Fakti që shpërthimi ka ndodhur rreth orës 08:30, kur edhe lëvizja është e pakët, aq më tepër tani, kur ka nisur dhe muaji i Ramazanit, ka bërë siç duket që fatmirësisht dëmet në njerëz të jenë të kufizuara. /tesheshi.com/
