Pak ditë pas çeljes së muzeut “BunkArt 2”, në oborrin e ministrisë së Brendshme në Tiranë, ka shpërthyer me një lumë akuzash presidenti i Republikës, Bujar Nishani. Ai i ka cilësuar këto ambjente si “vepra arti” të ngritura për turizëm, përmes një lustrimi fals të ngjarjeve apo fakteve historike.
“Në Shqipëri, për fat të keq, vërehen sot e kësaj dite disa tendenca dhe përpjekje për të rilindur të kaluarën e hidhur dhe për ta justifikuar atë në një farë mënyre. Kjo gjë e dëmshme për vetë shoqërinë tonë, për historinë, por sidomos për brezat e rinj, të cilët nuk e kanë jetuar atë kohë, po bëhet nëpërmjet glorifikimit të figurave të dalaboje të regjimit totalitar, nëpërmjet shndërrimit të objekteve të urryera të diktaturës në të ashtuquajtura ‘vepra arti’ dhe vende turistike, apo edhe nëpërmjet një lustrimi fals të ngjarjeve apo fakteve historike”, u shpreh Nishani, gjatë një konference të mbajtur në Sallonin e Deputetëve të Parlamentit Evropian mbi “Krimet e regjimit komunist në Shqipëri”, të organizuar nga Ministri belg i Shtetit dhe Euro-deputeti Louis Michel dhe Këshillit Kombëtar Shqiptaro-Evropian në Bruksel.
Nishani nuk ndaloi kritikat duke thënë se e shikon me dyshim realizimin e funksionit të Autoritetit të Hapjes së Dosjeve të Komunizmit, që u ngrit së fundmi me një vonesë të pajustifikuar.
“Paçka se nuk janë mbajtur kurrë seanca të tilla u miratua nga Kuvendi dhe hyri në fuqi më 30 tetor 2006, rezoluta ‘Për dënimin e Krimeve të kryera nga Regjimi komunist në Shqipëri’. Sot, pas një vonese të gjatë e të pajustifikuar, në Shqipëri është ngritur dhe konstituuar Autoriteti i Hapjes së Dosjeve të Komunizmit, i cili shpresojmë se do t’i përmbushë pritshmëritë e të përndjekurve dhe viktimave të regjimit, për t’ua qetësuar të paktën shpirtin si dhe për të gjetur eshtrat e të parëve”, u shpreh presidenti.
Nishani shprehu vlerësimin dhe mirënjohjen ndaj Diasporës shqiptare në përgjithësi, dhe asaj në Belgjikë në veçanti për sakrificat dhe përkushtimin që ka treguar për të denoncuar dhe demaskuar krimet e tmerrshme të komunizmit./tesheshi.com/
