Teksa qindra muslimanë po kryenin lutjet rituale në xhami, një bombë me benzinë shpërtheu jashtë saj. Një mesazh fyes ndaj Islamit qe shkruar në murin e xhamisë, duke e bërë të qartë objektivin e sulmit.
Ngjarja ndodhi në Kolegjin Islam Australian në Thornlie, në juglindje të Perth-it. Një makinë u dogj nga shpërthimi jashtë xhamisë, e besimtarët panë tre persona që po largoheshin me vrap.
Besohet, sipas policisë, që bomba të jetë vendosur në makinën e parkuar jashtë xhamisë përpara se të shpërthejë.
Nga shpërthimi nuk pati të lënduar, por mjedisi është sulmuar dhe herë të tjera gjatë viteve të shkuara, siç i ka deklaruar organit të lajmeve Perth Now, drejtori i kolegjit, Abdullah Khan.
Një drejtues i xhamisë, Yahya Adel Ibrahim, e çmoi sulmin si një krim për shkak të urrejtjes. “Ky është pa dyshim një akt kriminal urrejtjeje.”
Komisioni për të Drejtat e Njeriut në Australi regjistroi vitin e shkuar një shtim dramatik të sulmeve kundër bashkësive muslimane. Muslimanët australianë janë subjekt i denigrimit të vazhdueshëm racial dhe fetar.
Kryeministri i vendit, Malcolm Turnbull, e dënoi sulmin me bombë mbi xhaminë. /tesheshi.com/
