“Unë flas gjuhën polake, ti çfarë superfuqie ke?”. Jacek vjen nga një vend afër Varshavës dhe jeton në Londër prej disa vitesh. Ai ka veshur këtë bluzë të zezë, ku shkronjat me të verdhë tradhtojnë krenarinë për origjinën e tij. Është një prej 600 mijë polakëve që kanë zbarkuar në Britaninë e Madhe në dhjetët vjetët e fundit. Polakët ishin në numër të kufizuar deri në vitin 2004, por më pas rruga londineze u bë e lehtë dhe e frutshme. Prej disa kohësh, ama është edhe shumë e rrezikshme. Polaku qëndron përballë zyrës kulturore të Polonisë në Hammersmith, në pjesën perëndimore të kryeqytetit britanik dhe shikon muret e ndërtesës mbi të cilat janë vizatuar grafiti dhe shkrime që përbajnë fyerje kundër polakëve, që përcaktohen si “parazitë”. Policia patrullon zonën dhe ka hapur një hetim kundër autorëve të panjohur të shkrimeve.
Por tensioni ka kohë që vlon. Vetëm dy ditë më parë, në zonën perëndimore të qytetit, u sulmuan disa muslimanë dhe emigrantë nga Europa Lindore, nga banda supremaciste angleze. “Eshtë klima e post-Brexit që nuk e dëshironim”, thotë ish-ministrja Sayeeda Warsi e cila para disa javësh braktisi fushatën e largimit nga BE pasi ishte shndërruar në “rraciste dhe plot urrejtje”.
Episodet e mungesës së tolerancës janë rritur shumë ditët e fundit, sidomos pas referendumit. Një punonjëse muslimane e lindur në Galles, u bllokua në rrugë e agresorët e “ftuan” atë të bënte gati valixhet, në Cambridgeshire ka nisur një fushatë urrejtjeje kundër komunitetit polak. Shkrimet që i cilësojnë polakët parazitë janë shfaqur edhe një shkollë fillore.
Retorika e ndezur kundër emigrantëve nga Nigel Farage është amplifikuar në një poster që mban imazhin e mijëra refugjatëve në radhë në Slloveni, me diçiturën “pika e thyerjes”. Kjo retorike është ende pikë referimi për disa, jo edhe aq në pakicë, fragmente të shoqërisë.
Perceptimi se janë të “tjerët”, “të huajt” që u marrin vendet e punës anglezëve, që ulin rrogat, që mbipopullojnë transportin publik, më në fund ka ndikuar në votim: tema e emigracionit ishte motivi i dytë më i rëndësishëm që drejtoi zgjedhjen e votuesve, si konservatorë ashtu edhe laburistë. Sidomos në zonat rurale, në jug dhe në veri të vendit, kjo pati ndikim në shtresat më të margjinalizuara. Farage pikërisht një ditë më parë ka sjellë në kujtesë se ato zona – shumë prej të cilave bastione të laburistëve- tashmë janë në shënjestrën e UKIP, partisë euroskeptike.
Nëse ka një protestë të dukshme kundër emigrantëve, ndonjëherë e dhunshme por më së shumti e zhurmshme, ka edhe një tjetër që rrjedh në internet, në rrjetet sociale e në videot e postuara. Shërbimet sekrete britanike monitorojnë shumë grupe. Një ditë më parë, “Sunday Times” kreu një radiografi të këtyre grupeve në një artikull në faqet kushtuar situatës post-Brexit.
Janë grupet e ekstremit të djathtë, supremacistët, racistët, izolacionistët dhe anti-emigracionit. Këto janë duke prosperuar dhe gjithnjë në rritje. Materializimi i ekstremizmit është i disponueshëm kudo në rrjetet sociale.
Një grup i tillë “National Action”, që ka lindur për të “festuar” vdekjen e deputetes Jo Cox, tashmë ka gjashtëdhjetë pëlqime, por videot e tij në Youtube kanë 1800 klikime. Pak, në detin e trazuar të internetit, shpjegojnë specialistët e antiterrorizmit, por shumë duke marrë parasysh se grupi ka shumë pak kohë që është i dukshëm në internet. Ata proklamojnë një “xhihad të bardhë”, një luftë të shenjtë të bardhë, që do të thotë shndërrimin në homogjene “të vlerave tradicionale angleze” në këtë tokë, që sipas tyre, mban njerz që vijnë nga çdo cep i botës e që është kthyer në një makth kulturash.
“Refugjatët nuk janë të mirëpritur”, lexohet në një nga proklamatat tyre që shkon në radhë me deklaratën tjetër “Hitleri kishte të drejtë, refugjatët duhet të kthehen në shtëpi”.
Të shtunën në Neëcastle, qytet në verilindje, ekstremistët kanë manifestuar në stacionin qendror duke hedhur sllogane kundër emigrantëve. Në kohët e fundit ka lindur edhe një shoqatë tjetër,
NorthWest Infidels, që vjen nga Liga e Mbrojtjes Angleze, e cila do të dëshironte “varjen e Corbyn” dhe që ka gjetur tek Islami, armikun e deklaruar. Kështu ashtu sikundër edhe shoqata “Britania e Para”, e cila ka marrë në mbrojtje vrasësin e Jo Cox.
Pikërisht NorthWest Infidels ka lëshuar edhe një mesazh për agresorin e deputetes, Thomas Mair, ku bën thirrje për mbrojtjen e Anglisë “nga pushtimi i refugjatëve në mënyrë që sakrifica e Mair të mos shkojë kot”.
Përgatiti: Juli Prifti – /tesheshi.com/
