Shtimi i numrit të refugjatëve që kërkojnë azil në vendet e Bashkimit Europian ka krijuar tension dhe mosmarrëveshje lidhur me politikat e BE-së për emigracionin. Gjermania është e përgatitur të pranojë një numër të madh azilkërkuesish, por nuk mund të thuhet e njëjta gjë për vendet e tjera. Kryeministri i Hungarisë, nga Brukseli ku zhvilloi bisedime për krizën e refugjatëve në vendin e tij, tha se vendosja e kontrolleve kufitare është gjëja e parë që duhet bërë.
“Hungarezët janë të frikësuar”, tha ai. “Popujt e Europës janë të mbushur me frikë për shkak se shohin sesi liderët europianë, mes tyre edhe kryeministra, nuk janë në gjendje të mbajnë nën kontroll situatën”.
Gjatë një konference të tensionuar shtypi së bashku me presidentin e Parlamentit Europian, Martin Shulc, lideri hungarez deklaroi se kriza e refugjatëve është një problem gjerman.
“Askush nuk dëshiron të qëndrojë në Hungari”, tha ai, “detyra jonë është vetëm regjistrimi i të gjithë refugjatëve”.
Refugjatët që prisnin prej dy ditësh përpara stacionit qendror të Budapestit, Keleti, me bileta në duar, më në fund, arritën të hyjnë në stacion, pasi policia u largua në orët e mëngjesit. Mirëpo, ata nuk mund të shkojnë kurrkund pasi trenat janë pezulluar. Kufijtë me Austrinë dhe Sllovakinë janë të mbyllur, duke limituar mundësinë e udhëtimit të refugjatëve.
Më herët, tre shtete perëndimore europiane u përpoqën të gjejnë një zgjidhje të vogël për atë që cilësohet krizë e paprecedent e refugjatëve në BE. Italia, Gjermania dhe Franca kërkuan një zgjidhje të përbashkët për krizën e miliona refugjatëve.
Ministrat e Jashtëm të tre vendeve paraqitën përpara Bashkimit Europian një dokument të përbashkët për rishikimin e rregullave të azilit dhe për një shpërndarje më të drejtë të barrës së refugjatëve.
Por, përpjekja e tyre duket se nuk mbështetet nga disa vende që kërkojnë zgjidhje të tjera. Në një artikull të botuar në gazetën gjermane, Frankfurt Allgemeine Zeitung, kryeministri hungarez, Orban shkruan se vendi i tij është “përmbytur” nga refugjatët që kërcënojnë rrënjët e krishtera të kontinentit.
Ndërsa, ministri i Jashtëm i Luksemburgut që mban edhe presidencën e BE-së, bëri thirrje për krijimin e një agjencie europiane për refugjatët dhe për vendosjen e trupave në kufij në rast të ndonjë krize.
Jean Asselborn tha se të gjitha vendet e BE-së duhet të kenë aftësinë të marrin në vendet e tyre refugjatë.
“Vlerat e BE-së janë të vlefshme në të gjithë bllokun. Askush nuk mund të thojë se nuk do muslimanët apo të zinjtë”, tha ai.
Fotoja e vogëlushit sirian, të mbytur në brigjet turke, duket se është bërë tashmë simbol i një krize të rëndë, që kërkon zgjidhje sa më parë. /tesheshi.com/
Përgatiti: Juli Prifti
