Shpërthejnë luftimet në Damask, sulm i kryengritësve

Pjesa lindore e kryeqytetit sirian është përfshirë nga luftimet prej së dielës, si rezultat i një sulmi të befasishëm të kryengritësve mbi forcat e regjimit të Esadit.

Luftimet, duke iu referuar Al Jazeera-s, janë përqendruar në një hapësirë të kontrolluar nga qeveria mes lagjeve Xhobar dhe Kabun. Grupi kryengritës Ahraru’sh-Sham pretendon se zona tashmë është çliruar.

Kryengritësit shpërthyen dy makina-bombë një ditë më parë pranë Xhobarit, me përgjegjësinë të marrë nga Tahriru-sh-Shami.

Kontrolli i Xhobarit, një lagje fushëbetejë për më shumë se dy vite, raporton Al Jazeera, është i ndarë midis kryengritësve, në njërën anë, dhe forcave qeveritare, në anën tjetër. Një prej tre xhepave në Damask ende në duart e kryengritësve.

Forcat e regjimit kanë kërkuar prej kohësh t’i nxjerrin kryengritësit nga kjo zonë, për shkak të afërsisë me qendrën e kryeqytetit, por sipas drejtuesit të Observatorit Sirian për të Drejtat e Njeriut, Rami Abdel Rahman, kryengritësit kanë kaluar nga një pozicion mbrojtës në Xhobar në një të tillë sulmues.

Media zyrtare e regjimit sirian foli për zmbrapsje nga ushtria të një sulmi nga “terroristë” që kishin depërtuar përmes tuneleve.

“Ky përparim është më i madhi për grupet opozitare në mbi një vit e gjysmë,” njoftoi një raportues i Al Jazeera-s nga pranë Damaskut.

Sulmi në Damask vjen vetëm pak ditë para një raundi të ri bisedimesh në Gjenevë; bisedime të ndërmjetësuara nga OKB-ja dhe që synojnë t’i japin fund konfliktit të përgjakshëm gjashtëvjeçar. /tesheshi.com/