Presidenti i Kosovës Hashim Thaçi ka bërë me dije se shpërndarja e sotme e Kuvendit çon në shpejtimin e hapave drejt organizimit të zgjedhjeve të parakohshme parlamentare.
Ai ka thënë se brenda një kohe të shkurtër do të marrë vendim për dekretim të datës së zgjedhjeve.
“Tani është në interes të qytetarëve të Kosovës që pas një procesi zgjedhor demokratik të kemi sa më shpejt një qeveri funksionale dhe llogaridhënëse, e cila i përballon sfidat që na presin si shtet dhe shoqëri”, ka thënë Thaçi në një komunikatë për media.
Sipas tij, zgjedhjet e reja duhet të jenë të organizuara mirë dhe procesi të jetë demokratik.
Kushtetuta qartëson se zgjedhjet e rregullta parlamentare duhet të mbahen më së voni tridhjetë ditë para përfundimit të mandatit qeverisës, kurse në raste të shpërndarjes së Kuvendit, jo më vonë se dyzet e pesë ditë pas shpërndarjes.
Kjo bën të kuptojmë se po që se do të zbatohet kushtetuta, zgjedhje do të ketë në tetor. /tesheshi.com/
