Parlamenti i Kosovës u shpërnda. Deputetët votuan në favor të shpërndarjes duke hapur rrugën që presidenti Hashim Thaçi të shpallë datën e mbajtjes së zgjedhjeve të parakohshme, që sipas Kushtetutës, duhet të mbahen jo më vonë se 45 ditë pas shpërndarjes së parlamentit.
Kjo është hera e parë që parlamenti voton për shpërndarjen e tij – thekson VOA në raportimin e saj.
Vendimi pasoi dorëheqjen e kryeministrit Ramush Haradinaj më 19 korrik, e kjo pasi u thirr për t’u marrë në pyetje nga Specialja në Hagë e cila trajton pretendimet për krime lufte dhe të pasluftës në Kosovë.
Dorëheqja e zotit Haradinaj i dha fund koalicionit ndërmjet Partisë Demokratike, Aleancës për Ardhmërinë e Kosovës dhe Nismës Socialdemokrate (PAN), të cilat garuan së bashku ne zgjedhjet e përgjithshme të 11 qershorit të vitit 2017.
Që nga shpallja e pavarësisë së Kosovës në vitin 2008, asnjë qeveri nuk e ka përmbushur mandatin 4-vjeçar – konstaton VOA. /tesheshi.com/
