Kryetari i komunës së Prishtinës, Shpend Ahmeti, duke polemizuar me “eksponentë të qeverisë” në një postim në Facebook, ka folur për ato që i ka quajtur bllokada të qeverisë së Kosovës ndaj Prishtinës.
Ai ka shkruajtur mes të tjerash se, me gjithë bllokimet, tentimpengesat, etj., Komuna e Prishtinës e përmbyll një prej viteve më të suksesshme në realizimin e buxhetit.
Ja se ç’shkruan hollë e gjatë Shpend Ahmeti në Facebook:
“Ditëve të fundit, eksponentë të qeverisë kanë gënjyer publikun me të dhëna të pasakta të gjoja teprimit të buxhetit nga komuna e Prishtinës.
Për hir të së vërtetës dhe për t’u dëshmuar qytetarëve se me kë kemi të bëjmë, i kemi lënë të flasin pa reaguar.
Mirëpo, tani na duhet ta themi të vërtetën. Sivjet Komuna e Prishtinës ka patur shpenzime rekorde.
– Buxheti i Komunës së Prishtinës për vitin 2015 ka qenë 62 milionë euro, ndërsa janë shpenzuar 64 milionë euro, prej të cilave 24 milionë euro në investime kapitale (me rekord në infrastrukturë).
– Për herë të parë në historinë e Prishtinës janë shpenzuar deri në fund mjetet nga granti qeveritar, pra, nuk humbet ASNJË EURO.
– Do t’i shpenzonim edhe bartjet në maksimum, por sivjet kemi pas mungesë të të hyrave, të cilat i shpjegojmë në vijim.
- Qeveria nuk ia ka paguar komunës së Prishtinës 7 milionë euro në emër të tokës që ia ka marrë për nevoja të veta. Edhe pse me ligj kërkohet që brenda dy viteve të paguhet kjo shumë, kanë kaluar mbi pesë vite, dhe kjo tashmë është shkelje e rëndë ligjore.
- Qeveria mban të bllokuar ‘Parking Prishtina’, ku kanë qenë të parapara minimumi 1 milion euro të hyra në vitin 2015. Edhe pse i kemi përmbushur të gjitha kushtet, kryeministri e mban të bllokuar.
- Lajmi për faljen e borxheve pa shpjeguar si, i ka dëmtuar të gjitha komunat në të hyrat vetanake. Përkundër kësaj, kemi mbledhur mbi 83 për qind të tatimit në pronë.
- Edhe pse është dhënë numri rekord i lejeve të ndërtimit, pagesat bëhen me këste, dhe rezultati i këtyre të hyrave do të shihet vitin e ardhshëm.
Pra, me gjithë bllokimet, tentimpengesat, etj., Komuna e Prishtinës e përmbyll një prej viteve më të suksesshme në realizimin e buxhetit. Po të merrej qeveria me realizimin e investimeve kapitale të veta aq sa është marrë me bllokimin e Prishtinës, Kosova do t’i kishte punët më mirë.” /tesheshi.com/
