Komuna e Prishtinës e udhëhequr nga Shpend Ahmeti gjatë tremujorit të parë të këtij viti i ka harxhuar nga mjetet e planifikuara për shpenzime kapitale vetëm 150 mijë e 605 euro, që përkthyer në përqindje i bie se nuk e ka arritur as shifrën 0, 40 %. Kwto mjete të planifikuara si kategori buxhetore në shpenzimet kapitale komuna ka planifikuar afërisht 39 milionë euro, përfshirë këtu edhe mjetet e bartura nga viti i kaluar.
Një shpenzim kaq të vogël për këtë kategori, sipas shefit të grupit të këshilltarëve të PDK-së në KK, Lirak Çelaj, përbën shqetësim goxha të madh, pasi që, sipas tij, shpenzimet e parasë publike në fund të vitit do të jenë më keq se vitin e kaluar, kur kanë shkuar si suficit rreth 1 milion e 700 mijë euro, kurse nga të hyrat vetjake janë bartur rreth 18 milionë euro mjete, saktësisht 17 milionë e 893 mijë e 989 euro. Madje, Çelaj shfaq dyshim se në raportin tremujor nuk ka prerje të saktë.
“Po dyshoj që është bërë prerje e saktë buxhetore, që do të duhej të ishte deri më 31 mars. Në raport bëhet fjalë edhe për tenderë, siç është ai për gropa, që është shpallur në prill”, ka thënë Çelaj, për të vijuar se kjo tregon se trendët mund të duken edhe më shqetësuese. Ndërkaq, faktin që Komuna thekson në raport se janë shpenzuar gjithsej nga buxheti 10, 4 %, duke përfshirë edhe bartjen prej rreth 18 milionë eurosh, për Çelajn, nuk paraqet asgjë pozitive. /tesheshi.com/
