Kryetari i Prishtinës, Shpend Ahmeti, ka reaguar ndaj bojkotimit që LDK dhe PDK i kanë bërë seancës së sotme të kuvendit komunal të Prishtinës, ku pritej të diskutohej për ndarjen e një parcele për ndërtimin e Ambasadës së Shqipërisë në Kosovë.
Ahmeti thotë se këtë çështje e ka diskutuar me përfaqësuesit e Shqipërisë për disa muaj rresht, dhe janë dakorduar për lokacionin e ri të Ambasadës në qendër të qytetit.
“Qe dy javë kam kërkuar mbledhje të jashtëzakonshme të Kuvendit për të proceduar para mbledhjes se përbashkët të dy qeverive. Kur e vërejtëm hezitimin e Kryesuesit, e kuptova se në vitin 2007 apo 2008 Komuna gjatë udhëheqjes së LDK-së kishte ndarë këtë lokacion për partinë, pra për LDK-në, për ta ndërtuar selinë shumëkatëshe të partisë. Sot LDK e bojkotoi mbledhjen duke thënë se ajo tokë është e tyre. Po ashtu PDK ka bojkotuar seancën duke dalë hapur kundër Shqipërisë për interesa të LDK-së”, ka shkruar Ahmeti në Facebook.
Ahmeti thotë se kjo nuk është hera e parë që komuna gjatë viteve të qeverisjes së tyre, duke iu referuar LDK-së, ka ndarë prona për vetveten, por kjo e sotmja i tejkalon kufijtë e një beteje të cektë politike që po e bëjnë individë të caktuar brenda dhe jashtë kuvendit komunal.
“Republika e Kosovës ka Ambasadë në qendër të Tiranës. Ky veprim i LDK/PDK në KK Prishtina është turp për shtetin tonë. Qoftë në ndërgjegjen e tyre”, ka thënë Ahmeti.
/tesheshi.com/
