Furnizimi me ujë nga paslufta është një problem me të cilët ballafaqohen qytetarët e Prishtinës. Por kjo siç duket tashmë do jetë një brengë e kaluar për ta, nëse i referkohemi premtimit të kryetarit Shpend Ahmeti, i cili ka bërë të ditur se prej pjesës së dytë të muajit mars, kryeqyteti do të ketë furnizim me ujë, gjatë 24 orëve.
Ai në profilin e tij në Facebook ka shkruar se ka vizituar punët përfundimtare në fabrikën e re të ujit, e cila do lëshohet në testim pas datës 17 mars.
“Janë ndërruar një pjesë e madhe e gypave në vitet 2014 – 2015, me kredinë e KfW dhe pjesëmarrjen e Komunës dhe Qeverisë (me nga 5 milionë euro) është bërë edhe fabrika e re e ujit, dhe është përmirësuar dukshëm inkasimi. Në vitet në vijim kanë mbetur që bashkë me ujësjellësin të zgjidhim edhe problemet në pikat e larta dhe në ndërtesat kolektive (aty ku ka prishje). Ky është ndër lajmet më të mira për kryeqytetin dhe shfrytëzoj rastin që në emër të qytetarëve të Komunës të falenderoj të gjithë ata që kanë punuar që kjo ditë të vjen në komunën tonë”, ka shkruar Ahmeti. /tesheshi.com/
