Nga Blendi Gashi
Pas një muaji fushatë zgjedhore për lokalet e 22 tetorit, kandidatëve për kryetarë të komunave u kanë mbetur edhe pak orë që të bëjnë edhe ndonjë premtim dhe më pas të presin verdiktin e qytetarëve.
Garë e madhe do zhvillohet pothuasje në t ëgjitha komunat pasi asnjë prej kandidatëve nuk e ka të sigurt fitoren dhe shumica pritet të shkojnë në balotazh.
Megjithatë sytë e gjithë opinionit më shumë janë të drejtuar kah Prishtina, ku pritet të ketë një garë të fortë mes kryetarit aktual Shpend Ahmeti nga Vetëvendosje i cili synon edhe një mandat, dhe Arban Abrashit të LDK-së i cili synon t’ia rikthejë partisë pushtetin në kryeqendër.
Ndërsa Ahmeti pret fitore pa balotazh, Abrashi është shprehur i bindur se asnjë nga kandidatët nuk do të arrijë të fitojë më shumë se 50 për qind të votave, dhe ka thënë hapur se balotazhi do jetë mes tij dhe kandidatit të VV-së.
“Ahmeti nuk fiton pa balotazh. As unë nuk do të fitoj. Balotazhi do të jetë mes meje dhe Shpend Ahmetit me siguri. Më pas do të shpalos sërish programin dhe të pres votën e qytetarëve. Balotazh do të ketë sigurisht”, ka thënë Abrashi së fundmi në një paraqitje për mediat.
Se gara do jetë tejet e paparashikueshme e thonë edhe analistët politikë por që për një nuancë e shohin favorit Ahmetin.
Megjithatë, ata thonë se nëse vetëvendosësi nuk arrinë fitore në raundin e parë gjërat mund t’i komplikohen në balotazh pasi partitë tjera mund të përkrahin kandidatin e LDK-së.
Politologu Mentor Tahiri, thotë se zgjedhjet që do të mbahen të dielen, nuk mund të analizohen pa pasur në konsideratë edhe sasinë e përgjitshme të pakënaqësisë në nivel vendi.
Ai thotë se pavarësisht se bëhet fjalë për zgjedhjen e pushtetit lokal, distanca e shkurtër kohore me zgjedhjet e përgjithshme të mbajtura me 11 qershor, bën që rezultati i atëhershëm të reflektojë sërish por duke shkuar në dëm të partive të koalicionit qeverisës.
Sipas Tahirit, beteja për Prishtinën do të jetë ndërmjet dy forcave kryesore opozitare VV-së e LDK-së, por shton se asnjëra nuk mund të arrijë fitore në raundin e parë.
“Pa dyshim, Lëvizja Vetëvendosje është sot subjekt më i madh politik në Kosovë, kurse sondazhet tregojnë këtë edhe për Prishtinën. Por në Prishtinë kjo distancë në raport me LDK-në, sikurse edhe tregojnë këto sondazhe, nuk është e tillë sa të garantojë një fitore komode. Për dallim nga zgjedhjet e kaluara lokale kur ishte në opozitë edhe në Prishtinë, tani Lëvizja Vetëvendosje nuk është imune ndaj kritikave. Ka kritika për punë të pamjaftueshme si dhe për punësime të militantëve në Komunë apo sektorin e arsimit. Një gjë e tillë u dallua edhe në debatet në kuadër të fushatës zgjedhore. Kontigjenti i votave që kandidati i Lëvizjes Vetëvendosje mund të ketë humbur në këto debate, ia pamundëson fitoren pa balotazh”, thotë Tahiri për tesheshi.com.
Ai mendon se beteja më e madhe do jetë në balotazh ku sipas tij mund të ndodhin gjëra të paparashikueshme.
“Gara për të parin e komunës së Prishtinës mund të jetë e paparashikueshme në një balotazh eventual, ngase aty më pas hynë në opcion kompromiset e ndryshme për përkrahje nga subjekte politike të cilat do të mbesin jashtë garës”, thotë Tahiri.
Fadil Lepaja, njohës i rrathanave politikem i jep më shumë shanca për fitore vetëvendosësit Ahmeti.
“Favorit është Shpend Ahmeti, por nuk i përjashtoj as Abrashin e LDK-së e Pacollin e AKR-së. Nëse Ahmeti arrinë të fitojë pa balotazh, kjo mund të jetë si rezultat i devalvimit të partive tjera dhe rritjes së besueshmërisë të VV-së. Por nëse shkon në balotazh, mendoj se vijnë në shprehje marrëveshjet e fshehta mes partive dhe aty Vetëvendosje është e hendikepuar” thotë Lepaja për tesheshi.com.
Kujtojmë se në zgjedhjet lokale të 2013-ës, Ahmeti e mundi në balotazh Isa Mustafën edhe pse ky i fundit kishte një epërsi mbi 10 % të votave nga vetëvendosësi. /tesheshi.com/
