Që kombëtarja gjermane e futbollit, e ka të ardhmen e siguruar të paktën për 10 vjet, kjo është evidente, kur sheh se në dy kompeticione ndërkombëtare, paralele, dy përfaqësueset janë në finale.
Në Kupën e Konfederatave, skuadra B e Joachim Low, mundi në gjysëmfinale Meksikën 4-1, duke shkuar me prepotencë drejt trofeut, në finalen që do luajë kundër Kilit.
Një “luan” i ri shkëlqeu në mesfushë, Goretzka (Leon emri i tij), i cili mori ekipin përdore, duke shënuar 2 gola. Gjermania eksperimentale, ku lojtari më i vjetër është 27 vjeç, mbajti ritëm të lartë dhe deri tani ka shënuar 14 gola në 4 ndeshje. Ndërkohë të tjerë “çiliminj” gjermanë, sic janë ata të Përfaqësueses U 23, kanë siguruar finalen ne Kampionatin Europian.
E të mendosh se në asnjërën prej dy kombëtareve, nuk luan ndonjë VIP nga formacioni që u shpall Kampion Bote. Kroos, Boateng, Hummels, Muller, Khedira e Ozil, nuk “duhet të pushojnë” shumë, nëse do të pretendojnë më formacionin e Manchaft.
“Luanët” e rinj janë të uritur e janë gati t’ua zënë vendin në mbretërim. Shifrat kanë folur, e fama e emrit, jo gjithnjë ta siguron vendin në formacion, sidomos me një trajner si Low, që argëtohet nga konkurenca dhe nxit vazhdimisht të rinjtë. /tesheshi.com/
