Nga Bashkim Kastrati
Sot në Gjykatën e Apelit të Kosovës, u mbajt seanca e kolegjit në rastin penal kundër kryetarit të Prizrenit Ramadan Muja dhe pesë zyrtarëve tjerë komunal të këtij qyteti. Të gjithë këta akuzohen për shpërdorim të detyrës zyrtare dhe autoritetit. Në fjalën e tij para kolegjit të Apelit Ramadan Muja tha se është i bindur që kjo gjykatë do të vendosë drejt.
Ai tha se për vendimin për të cilin po akuzohet nuk duhet dënuar pasi që vendimin në fjalë e ka marrë në shërbim të qytetarëve të Prizrenit, e jo të bëjë shkelje ligjore.
“Veprimet për të cilat po akuzohem i kam bërë në interes të shoqërisë, në veçanti të qytetarëve të Prizrenit, të cilët tri herë radhas mi kanë dhënë më shumë se 30 mijë vota. Deri sa të kem energji fizike dhe mendore do të bëj prapë përpjekje të kontribuoj në të mirë të shoqërisë. Juve ju mbetet ta merrni vendimin e drejtë në të cilin nuk dyshoj”, u shpreh Muja.
Gashi e barazon Mujën me Krishtin!
Ndërsa njeri ndër Avokatet e tij mbrojtës Tomë Gashi, ka deklaruar para trupit gjykues se Ramadan Muja është njeri i mirë dhe nuk është kriminel.
“Ai duhet të shpërblehet, sepse gjithçka që ka bërë, ka bërë në interes të qytetarëve të komunës së Prizrenit,” thotë Gashi, duke shtuar se Muja është një person publik dhe që ka kontribuar shumë për Prizrenin.
Gashi tutje bëri edhe tërheqje të një paraleleje mes Ramadan Mujës dhe Jezu Krishtit, duke thënë se edhe Ramadan Muja, njëjtë si Krishti po dërgohet në kryq dhe po cilësohet kriminel vetëm pse veproi drejtë.
“Kjo thotë se po bëhet me ndikime politike, pasi për Prizrenin kryetari i tyre duhet të cilësohet hero. Nëse doni ta kryqëzoni Mujën për shkak se e ka kryer në mënyrë të drejtë punën e tij, atëherë shpalleni fajtor, sepse po vërehet se gjykimi i tij është politik”, ka thënë Gashi.
Gjykata e Apelit do të vendosë brenda afatit ligjor
Zyra për informim e Gjykatës së Apelit përmes një komunikate ka njoftuar se pas referimit të lëndës nga ana e kryetarit të kolegjit gjyqësor, gjyqtari ndërkombëtar Piotr Bojarczuk, palët shfaqën pretendimet e veta ankimore lidhur me aktgjykimin e shkallës së parë, duke e kundërshtuar në tërësi atë.
“Kolegji në përbërje të te cilit janë edhe gjyqtarët vendor z. Driton Muharremi dhe z. Abdullah Ahmeti, pasi ta ketë pleqëruar çështjen, mbi bazën e të dhënave të gjeturave do të marrë një vendim , të cilin do t’ua kumtojë palëve në formë të shkruar, përmes gjykatës së shkalles së parë, brenda afatit ligjor”, thuhet në komunikatën e zyrës për informim të kësaj gjykate.
Kryetari i Prizrenit Ramadan Muja, së bashku me pesë zyrtarë tjerë komunalë më 13 mars 2014 u gjetën fajtorë dhe u dënuan nga Gjykata Themelore e Prizrenit për veprat penale të keqpërdorimit të detyrës dhe autoritetit zyrtar.
Në rast se Gjykata e Apelit nuk e ndryshon vendimin e Gjykatës Themelore të Prizrenit, kjo komunë duhet të shkojë në zgjedhje të parakohshme.
Ramadan Muja u dënua para më shumë se një viti me 2 vjet burgim me kusht për keqpërdorim të detyrës, bashkë me Sadik Pacarizin (8 muaj burg me kusht), Avni Ademaj (5 muaj burg me kusht), Kadri Ukimeri, Avdullah Tejeci (1 muaj burg me kusht) dhe Minir Krasniqi (1 vite e gjashtë muaj burg me kusht).
Muja është akuzuar nga EULEX-i se kishte bërë keqpërdorime me prona komunale, të cilat ishin nën menaxhim të AKP-së. Sipas aktakuzës, ato ishin kthyer brenda ditës në prona komunale, pa asnjë procedurë dhe vendim të Kuvendit Komunal, për t’iu dhënë pastaj në shfrytëzim kompanive private, një fabrike të çokollatës dhe Qendrës Arsimore turke, Gulistan.
/tesheshi.com/
