Nga Blendi Gashi
Ndërsa Ramushi dhe njerëzit e tij po lavdërojnë 3-mujorin e parë duke thënë se kanë marrë vendime të mëdha ku përmendin nënshkrimin e kontratës për termocentralin “Kosova e Re”, opozita dhe shoqëria civile po e cilësojnë të dështuar ku ironizojnë duke thënë se “suksesi” më i madh është emërimi i mbi 70 zv.ministrave.
Organizatat joqeveritare, Grupi për Studime Juridike dhe Politike (GLPS), Instituti GAP, dhe Instituti për Politika Zhvillimore (INDEP), thonë se qeveria ka marrë disa vendime jo ligjore, ka qenë jo transparente dhe ka dështuar në arenën ndërkombëtare.
202 vendime të marra
Në 100-ditëshin e parë sipas kësaj analize janë marrë 202 vendime, 19 takime, janë miratuar 8 akte nënligjore, 22 iniciativa ndërkombëtare, kryesisht ato që kanë të bëjnë me kreditë financiare; 9 vendime për shpronësim, 11 shkarkime dhe disa emërime në bordet e agjencive publike.
“Disa nga këto vendime kanë qenë të pamenduara, të pabazuara dhe jo ligjore duke përfshirë shkarkimie e Komisionit Shtetëror për Shënjimin dhe Mirëmbajtjen e Kufirit Shtetëror; shkarkimin e 10 nga 19 anëtarët e bordeve të ndërmarrjeve publike; faljen e borxheve për ambalazhuesit e ujit që nga viti 2008 (51 milion euro); dhe, ndër të tjera, kompensimin financiar të familjeve të atyre qytetarëve të Kosovës të përfshirë në ngjarjen e Kumanovës”, thuhet në analizë.
36 pojektligje të miratuara
Referuar analizës, prioritetet e kryeministrit Haradinaj dhe kabinetit të tij nuk kanë përkuar me premtimet para-zgjedhore.
“Kosova nuk është më afër liberalizimit të vizave dhe nuk janë rritur ndjeshëm pensionet dhe pagat. Për më tepër kjo tregon që Qeveria më shumë vepron sipas impulseve dhe kërkon vëmendjen e medieve sesa që punon me plan strategjik për një qeverisje të mirë”.
Së dyti, analiza ofron një vlerësim të hollësishëm të programit legjislativ, më saktësisht projektligjet e hartuara, të miratuara dhe nismat e reja legjislative.
“Qeveria Haradinaj ka miratuar programin e ri legjislativ në fund të shtatorit, i cili është ndryshuar një muaj më vonë. Ky program përmban 74 projektligje të cilat duhej të miratoheshin deri në fund të vitit 2017. Nga këto, 50 janë të trashëguara nga qeveria e mëparshme, ndërsa vetëm 24 janë iniciativa të reja legjislative.
Gjithsej, deri më 18 dhjetor (fundi i 100 ditëshit) janë aprovuar 36 projektligje, përfshirë 3 projektligje të paparashikuara”, vlerësojnë organizatat.
Veç një njohje…
Analiza po ashtu pasqyron zhvillimet dhe sfidat kryesore të diplomacisë kosovare, duke u fokusuar në njohjet e pavarësisë së Kosovës dhe anëtarësimin e saj në organizata të ndryshme ndërkombëtare.
“Është regjistruar vetëm një njohje e pavarësisë, krahas dy pretendimeve të tërheqjeve të dyshimta të njohjes të cilat janë mohuar plotësisht nga Qeveria. Kjo e fundit nuk ia ka dalë gjatë 100 ditëve të para të saj të ndërmarrë një qasje proaktive në lidhje me anëtarësimin e Kosovës në organizata ndërkombëtare si Interpol dhe UNESCO”, thuhet më tej.
Qeveria jo transparente
Së fundmi, analiza përqendrohet në nivelin e transparencës që qeveria ka reflektuar gjatë 100 ditëshit të qeverisjes.
“Asnjë vendim rreth emërimeve të zëvendësministrave nuk është bërë publik, gjë që tregon mungesë transparence gjatë gjithë procesit. Veç kësaj, një varg dokumentesh të cilat janë kërkuar nga shoqëria civile ende nuk janë publikuar. Qeveria Haradinaj nuk ka ndërmarrë hapa gjatë 100 ditëve të para të saj për të publikuar dokumentet zyrtare siç janë kontrata për homologim të automjeteve, kontratat për ndërtimin e autostradave dhe, ndër të tjera, listat e bizneseve të cilat kanë përfituar nga falja e borxheve”, thotë analiza. /tesheshi.com/
