Janë mësuar pak më herët çiftet çerekfinaliste në dy aktivitetet futbollistike europiane, në Champions League dhe në Europa League.
Shorti ka vënë përballë Barcelonën me Atletikon e Madridit në Kupën e Kampionëve, dy skuadrat që udhëheqësin dhe kampionatin spanjoll.
Interesante është dhe përballja mes PSG-së dhe Mançester Sitit, dy skuadrave që duan medoemos ta fitojnë trofeun e Champions League-s. Me ambicie të jashtëzakonshme, njëri prej dy ekipeve, ai francez apo ai anglez, nuk do të jetë fatkeqësisht sërish në gjendje ta përmbushë këtë ëndërr.
Më i përkëdheluri duket të jetë Reali i Madridit, që do të ndeshet me Volfsburgun, skuadrën më pa pretendime mes të tetave. Edhe pse futbolli ka të papritura, kalimi i madrilenëve në gjysmëfinale duket goxha i thjeshtë krahasuar me ekipet e tjera.
Pas Juventusit, gjermanët e Bajernit të Mynihut do t’i presin dy ndeshje me Benfikën. Rruga drejt gjysmëfinaleve duket e hapur dhe për Bajernin.
Ndeshjet e para do të luhen më 5 dhe 6 prill, sipas kësaj radhe:
Bajern i Mynihut – Benfika
Barcelona – Atletiko e Madridit
Volfsburg – Real i Madridit
PSG – Mançester Siti
Në Europa League, shorti është treguar i pamëshirshëm me gjermanin Jurgen Klopp, trajnerin aktual të Liverpulit, që do të duhet t’i kundërvihet skuadrës me të cilën kaloi vite të tëra. Borusia e Dortmundit është kundërshtari i Liverpulit në çerekfinalet e Ligës së Europës. Klopp do të gjendet më 7 prill në Dortmund, me synimin për të mundur skuadrën të cilën e ringjiti në majën e futbollit gjerman.
Edhe këtu do të ketë një përplasje tërësisht spanjolle, mes Atletik Bilbaos dhe Seviljes.
Katër çiftet e çerekfinaleve të Europa League-s janë këto:
Sporting Braga – Shakhtar i Donjeckut
Vilareal – Sparta e Pragës
Atletik Bilbao – Sevilja
Borusia e Dortmundit – Liverpul
Takimet do të luhen më 7 dhe 14 prill. /tesheshi.com/
