Pas rastit kur Prokuroria e Krimeve të Rënda ka shoqëruar gazetarin investigativ Artan Hoxha, duke e marrë në mënyrë demonstrative nga studioja e emisionit “Opinion”, një pjesë e mediave e kanë sulmuar ashpër gazetarin, duke thënë se burimi i informacionit të tij ka qenë ministri i Brendshëm, Saimir Tahiri.
Ky sulm, që duket i nxitur nga qarqe brenda prokurorisë për të humbur gjurmët e ngjarjes së shoqërimit të gazetarit, e thellon edhe më tepër skandalin.
Kjo për faktin se, në rastin e gazetarit, nuk penalizohet ky i fundit se ka arritur ta tërheqë informacionin nga ato qarqe shtetërore të cilat kanë për detyrë ta ruajnë atë.
Ligji thekson në mënyrë të qartë se ruajtja e sekretit duhet të bëhet nga zyrtarët, të cilët duhet të ndëshkohen për rrjedhjen e informacionit.
Rasti i shoqërimit të Artan Hoxhës është jo vetëm i ngjashëm, por thuajse i njëjtë me atë të Aleksandër Frangajt në vitin 1995, kur ky i fundit ishte kryereaktor i gazetës “Koha Jonë”.
Frangaj u arrestua pasi kishte botuar në gazetë një lajm të shkurtër ku bëhej e ditur se autokolona ushtarake po shkonin drejt veriut.
Sipas qeverisë së atëhershme, ky fakt përbënte sekret, dhe nuk duhej të bëhej publik, por kamionët ushtarakë i kishte parë e gjithë njerëzia në rrugë, pa lënë gjë të fshehtë.
Aleksandër Frangaj u arrestua dhe mbajt në burg atëherë, pasi prokuroria ishte instrument në duart e pushtetit politik.
Edhe sot duket se shoqërimi i gazetarit Artan Hoxha, me synimin për të kapur faktin se ministri i Brendshëm ka qenë burimi i tij i informacionit, tregon për përdorimin politik të prokurorisë, e cila do të përmbyset nga e para vetëm pas disa muajsh, kur të nisë procesi i vettingut.
Dhe gati gjysmën e prokurorëve të sotëm rrezikojmë t’i shikojmë si deputetë në parlamentin e ardhshëm… /tesheshi.com/
