Nga Blendi Gashi
Ndërsa ende nuk ka të arrestuar për vrasjen e politikanit serb, Oliver Ivanoviç, këtë akt besohet ta kenë kryer strukturat kriminale që veprojnë në Veri.
Këtë pjesë pas 15 vitesh të kontrolluar nga tashmë i ndjeri Ivanoviç, e ka në dorë Milan Radojiçiç, të cilin politikanët serbë të Kosovës që nuk janë pjesë e Listës Serbe, e kanë akuzuar se e mban nën terror, duke drejtuar gishtin kah ai për vrasjen në fjalë.
Është ish-deputetja e Kuvendit të Kosovës, Rada Trajkoviç e cila e quan Radojiçiçin “shef i mafisë në territorin e Kosovës”.
“Mitrovica Veriore është pjesa me më së paku siguri nga hapësirat e banuara me serbë. Edhe pse thoshin dikur se Veriu është i lirë, ai është larg nga të qenit i lirë, sidomos pas marrëveshjes së Brukselit, kur pushtetin kryesor, edhe sipas fjalëve të kryeministrit të Kosovës, për çka unë jam befasuar kur e ka pranuar se për projektet madhore për serbët ai e ka partner Milan Radojçiqin, që sipas Bashkësisë ndërkombëtare është një mafioz i një mafie të fuqishme rajonale. Ky njeri e kontrollon plotësisht jetën në veri. Ai vendos çka është mirë e çka është keq”, ka thënë Trjakoviç.
Ajo ka thënë se kur Vuçiçi të vijë në Kosovë duhet të tregojë nëse do t’i izolojë njerëzit e Radojiçiçit për të çliruar serbët e veriut.
Njeriu që kontrollon Veriun, “shok” i Ramushit
E ky njeri që njeri që po ndjell frikë në Veri, ka kontaktet direkte me kryeministrin Haradinaj, për çka ky i fundit i ka cilësuar normale. Për më tepër, Ramushi u takua në tetor të vitit të kaluar me Milanin siç raportuan mediat kosovare për të siguruar nga ai votat e Listës Serbe për ta bërë qeverinë, çka edhe ndodhi më pas.
Pra “zyrtarisht” Haradinajt ka marrëveshje me “shefin e mafisë së Veriut”, siç quhet Radojiçiçi nga disa politikanë serbë.
Por qeveria e Kosovës nuk sheh asnjë problem që Haradinaj takohet me këtë individ, me arsyetimin se ajo nuk zgjedh kush janë përfaqësuesit e serbëve.
“Qeveria e Republikës së Kosovës, nuk mund të përzgjedhë se kush mund të jetë përfaqësues politik i komuniteteve që jetojnë në Kosovë. Në këtë kontekst, takimet që kryeministri i Kosovës i ka realizuar në të kaluarën dhe mund t’i realizojë në të ardhmen me përfaqësues të komuniteteve, bëhen në bazë të asaj, se kush i përfaqëson ata”, ka deklaruar Zyra për media e qeverisë.
Skandal…
Opozita dhe përfaqësues të OJQ-ve në Kosovë thonë se kryeministri duhet urgjentisht të ndërpresë bashkëpunimin me këtë njeri të strukturave paralele në Veri.
Haxhi Avdyli, deputet i LDK-së thotë se një kryeministër që legjitimon një kriminel e humb edhe legjitimitetin e vet.
“Bashkëpunimi me njerëz nga bota e krimit dhe parapolitikës është goditje e rëndë e legjitimitetit e politikës së njerëzve të zgjedhur duke i lënë vend bashkëpunimit me njerëzit e fortë të krimit”, thotë Avdyli për tesheshi.com.
Ehat Miftaraj, nga Instituti i Kosovës për Drejtësi thotë se kryeministri ka në dispozicion informacion nga policia dhe Agjencia për Intelegjencë lidhur me persona të cilët mund të jenë të pjesë e grupeve kriminale, andaj si kryeministri edhe përfaqësues tjerë shtetërorë duhet të evitojnë çdo mundësi të kontaktit dhe takimeve me njerëz të tillë.
“Në një shtet ku një kryeministër i vendit miqësohet apo zhvillon takime me persona me të kaluar kriminale pa dyshim se përbën skandal dhe dëshmon në praktikë integritetin e asaj qeverisje”, thotë Miftaraj për tesheshi.com.
Ja ç’deklaroi Haradinaj në një intervistë të dhënë në 100-ditëshin e punës së tij për emisionin ‘Slobodno Srpski’ në RTK 2, për Radojiçiçin:
“Unë punoj shumë mirë me kolegët serbë. Me zv.kryeministrin, Dalibor Jevtiq, me ministrat, Nenad Rikalon, Todosojeviqin. Punoj me kryetarin (e Mitrovicës Veriore), Rakiq, me Slavko Simiqin. Punoj me njerëzit nga veriu, Milan Radjoçiq. Besoj se edhe ai (Radojiçiç) e ka rolin e tij”.
Kush është ky njeri (Radojiçiç?
Njëri nga veriu, që pyetet për gjithçka. Unë flas edhe me të.
A është politikan ai?
Nuk është e thënë të jesh politikan. Secili e ka nga një rol. Unë flas me të gjithë. Jam i hapur për të gjithë. Nuk kam lidhje direkte me Beogradin, por të gjithë që jetojnë në Kosovë janë bashkëbisedues për mua.
Të rëndësishëm duhet të jenë ata që populli i ka zgjedhur?
Natyrisht, dhe unë punoj me ata që janë të zgjedhur.
Por, ju e përmendët këtë njeri. Unë nuk e di se kush është ai.
Nuk ka lidhje. Mund ta përmendja edhe dikë prej Pejës që ju nuk e njihni, por me rëndësi është që qëndrimi im…
Atë e ka përmendur në një konferencë edhe Vuçiçi.
Këtë nuk e di. Më vjen keq.
