Shoqatat e dala nga lufta e Ushtrisë Çlirimtare të Kosovës, i kanë dalë në mbështetje presidentit Thaçi, duke i bërë thirrje institucioneve përgjegjëse, qeverisë dhe kuvendit, që të ndërmarrin të gjithë hapat e duhur për formimin dhe ligjësimin e ushtrisë.
Shoqatat e luftës thonë se janë disa arsye madhore që duhet të veprohet në këtë drejtim, më këmbëngulje dhe në bashkëpunim me të gjitha faktorët e zhvillimeve strategjike në Kosovë dhe në hapësirën shqiptare në tërësi.
“Ndër këto arsye më të rëndësishme janë:
Nuk ka shtet të pavarur pa ushtrinë e tij, andaj edhe Kosova duhet ta ketë ushtrinë e saj.
Nuk ka vend në botë që nuk e mbështet fuqinë mbrojtëse në ushtrinë e tij, andaj edhe Kosova duhet ta mbështesë në ushtrinë e saj.
Ushtria e Kosovës është njëri nga faktorët më të rëndësishëm të pavarësisë së saj, por edhe faktori themelore i ruajtjes dhe mbrojtjes së lirisë së Kosovës.
Ushtria e Kosovës është gurëthemeli i sigurisë së saj, i mbrojtjes së saj, si dhe i garantimit të pavarësisë së Kosovës.
Ushtria e Kosovës është kërkesë e popullit të Kosovës, e të gjithë atyre që Kosovën e konsiderojnë pjesë të atdheut të tyre, pjesë të kulturës dhe të gjuhës së tyre, andaj ajo duhet të formohet sa më parë që të jetë e mundur, në mënyrë që të krijohet faktori themelore i sigurisë së Kosovës”, thuhet në kumtesë.
Shoqatat e luftës thonë se mbështesin të gjitha ato forca politike dhe shoqërore në vend që janë në shërbim të proceseve të krijimit dhe ligjësimit të ushtrisë.
“Ata që janë kundër, na kanë edhe në kundër, sepse i konsiderojmë kundër rrjedhës së proceseve historike që ka hapur Lufta e Ushtrisë Çlirimtare të Kosovës”, thuhet në kumtesë.
Shoqata e dala nga lufta thonë se deri tani kanë qenë shumë të durueshme lidhur me stërzgjatje për formimin e ushtrisë, por nëse kjo çështje nuk zgjidhet sa më parë, atëherë nuk e marrin përgjegjësinë për mosdëgjueshmëri qytetare. /tesheshi.com/
