Milo Gjukanoviç, kryeministri malazez që është kthyer në një “halë në sy” tek serbët dhe rusët, në mënyrë të çuditshme ka uruar ish-kreun e paramilitarëve serbë, Vojislav Sheshel pasi u shpall i pafajshëm nga Gjykata e Hagës.
Por ky urim ka tronditur partinë që drejton Kryeministri malazez, përkatësisht Partinë Demokratike të Socialistëve.
Në një deklaratë të PDS-së theksohet se kjo forcë politike është ndjerë e tronditur nga qëndrimi i Milo Gjukanoviçit. Deklarata është miratuar nga kryesia e partisë, e cila vepron realisht me urdhrin e Milos, por siç duket se është bërë nga ky i fundit për të amortizuar problemet me perëndimin.
PDS thekson në deklaratën e saj se “beson që Gjukanoviçi do të vazhdojë të zbatojë platformën që ka nisur që në vitin 1997.
Duke iu referuar kujtimeve të fazave të pjekjes politike dhe patriotike të Gjukanoviçit, Partia Demokratike e Socialistëve është e shokuar nga urimet që ai bëri pas shpalljes së pafajësisë së Vojislav Sheshelit.
Deklarata shkon edhe më tej kur kujton krimet e rënda gjatë luftës që kanë ndodhur në territorin e Malit të Zi kundër kroatëve dhe myslimanëve të Bosnjës.
“Ne nuk duam të besojmë se mesazhi i Gjykanoviçit për Sheshelin ishte gjithashtu një mesazh drejtuar autoriteteve shtetërore të Malit të Zi, të cilat kanë bërë të ditur se po hetojnë krimet që fatkeqësisht kanë ndodhur ndaj pakicave etnike në Mal të Zi pikërisht nga politika që vetë Gjykanoviç ka përshëndetur.
Pikërisht nga kjo politikë u ngritën kampet e përqendrimit në Morinj, Bukovica, Strpci, apo ndodhi marshi i palavdishëm drejt Dubrovnikut” – theksohet në deklaratën e PDS-së.
Partia e Gjukanoviçit shton më tej në deklaratën zyrtare se “është e pabesueshme që dikush në 2016-ën mund të përgëzohet politika e Sheshelit, e cila të paktën në Mal të Zi është dënuar dhe harruar pas 25 vitesh.
PDS, siç ka bërë në vitet 90 do të vazhdojë të kërkojë që krimet dhe kriminelët i kanë kryer ato, si dhe do të mbrojë minoritetet pavarësisht deklaratës së Gjukanoviçit”./tesheshi.com/
