Kryeministri Edi Rama ka zhvilluar sot një takim me drejtuesit e policisë, ku u vu re mungesa e ministrit teknik të Rendit.
Takimi u bë për të intensifkuar luftën anti-kanabis deri në një fitore të plotë të shtetit.
“Jemi të gjithë së bashku. Të dhënat janë shumë inkurajuese. Jemi përpara një situate të përmbysur nga pikëpamja e hartës së kultivimit. Baza e planit kombëtar është solide dhe zbatimi i përpiktë i kësaj baze në letër është shembull i qartë që nëse do të vazhdojmë me këtë vendosmëri dhe ritëm, me siguri që në fund të sezonit do të mund të themi se ia dolëm ta përmbysim situatën dhe t’i japim fund historisë së kultivimit të kanabisit”, tha Rama.
Ai ka inkurajuar drejtorin e Përgjithshëm të Policisë së Shtetit që të jetë i pamëshirshëm ndaj të gjithë atyre efektivëve të policisë të cilët nuk njoftojnë në raste të kultivimit të lëndëve narkotike.
Drejtori i Policisë së Shtetit, Haki Çako tha se këtë vit do të ketë 30 % më shumë fluturime se vitin e kaluar.
“Me skuadarën e Guardia Di Finanza ka filluar fluturimi ajrore në monitorim prej datës 15 maj dhe është llogaritur që këtë vit të kryhen 30% më shumë fluturime se viti i kaluar deri tani janë kryer 6 fluturime ajrore, janë selektuar 15 raste, por vetëm në një rast me 12 bimë është konstatuar kultivim. Gjithashtu gjatë këtij viti po kryhet monitorim nga ajri me helikopter të policisë. Deri tani janë bërë 21 fluturime dhe jaën konstatuar vetëm 7 raste”./tesheshi.com/
