Shefi i forcave të Armatosura franceze ka dhënë dorëheqjen pas një përplasjeje me presidentin Emmanuel Macron në lidhje me shkurtimet buxhetore. Gjenerali Pierre de Villiers tha me anë të një deklarate se nuk mund të garantonte më tej qëndrueshmërinë e modelit të Ushtrisë, që e konsideron të domosdoshëm për të siguruar mbrojtjen e Francës.
Qeveria e Francës, javën e kaluar, publikoi shkurtime madhore për të sjellë deficitin buxhetor poshtë nivelit tavan të vendosur nga Bashkimi Europian.
Macron tha se nuk do të toleronte kundërshtime nga ana e Ushtrisë.
“Nëse shefi ushtarak i stafit dhe presidenti kanë kundërshti për diçka, shefi ushtarak ikën”,tha Macron i cili si president është edhe kryekomandant i Ushtrisë.
Por, gjenerali de Villiers raportohet të ketë thënë se presidenti nuk duhet të ngatërrohet me të për këtë çështje, duke përdorur një gjuhë të ashpër. Ai po komentonte një shkurtim prej 850 milionë eurosh në shpenzimet ushtarake të buxhetit të vitit 2017. /tesheshi.com/
