Nga Mensur Krasniqi
Përveç mbështetjes të thuajse gjithë bashkëkombasve të vet, në shenjë përkrahjeje ndaj demokracisë në Turqi dhe kundër tentimit për grusht-shtet, presidenti i shtetit turk, Rexhep Taip Erdogan ka gëzuar përkrahje të madhe edhe nga qytetarët të përkatësisë fetare myslimane edhe në Maqedoni. Kështu, në mbrëmjen e djeshme me qindra myslimanë të moshave të ndryshme u mblodhën pranë ambasadës së Turqisë në mbështetje të liderit turk dhe me porosi që të dënohet ashpër ky tentim për grusht-shtet. Mirëpo ajo që më së shumti tërhoqi vëmendjen e opinionit dhe mediave në këtë tubim pranë ambasadës turke në Shkup, ishte prezenca e një shkupjani të njohur, për shkak se këndon ilahi, i sprovuar nga Zoti që nga fëmijëria e tij si invalid, Ertan Shakiri.
Ai për një moment gjatë lutjes së përbashkët të një kleriku shkupjan(hoxhë) për dëshmorët të cilët humbën jetën si pasojë e daljes zot në mbrojtje të shtetit turk ndaj trazirave gjatë tentimit të ushtrisë për grusht-shtet, nuk mundi të përmbahet dhe shpërtheu në lot. Ky moment emocional i Ertanit nuk i ka ikur aparatit të gazetarëve që shkruajnë për mediat turke “Yeni Ballkan” dhe “Time Ballkan”, me ç’rast Ertani të nesërmen ndodhej në faqen kryesore të këtyre gazetave prestigjioze në Turqi.
Pas kësaj portali tesheshi.com ka kontaktuar Ertan Shakirin për ta pyetur rreth këtij përjetimi. Sipas tij, ishte brenga e madhe për popullin mysliman, dhe presidentin e shtetit Taip Erdogan arsyeja që nuk mundi të përballojë përvuajtjen gjatë lutjes së hoxhës për dëshmorët në Turqi.
“Në momentin që hoxha filloi të lutet për popullin mysliman dhe viktimat e rënë nga zullumqarët që dëshirojnë të prishin gjithçka që Erdogani ka ndërtuar me mund ndër vite, unë nuk mundesha të ndalem nga lotët. Nga ana tjetër kur e di gjendjen time, nuk e di në çfarë forme tjetër t’i ndihmoj vëllezërit nga Turqia, përveçse mos t’i harroj në lutje”, shprehet Ertan Shakiri për tesheshi.com.
Megjithatë, Ertan Shakiri nuk ndjehet i kënaqur nga numri i pjesëmarrësve në protestën e djeshme, ngaqë sipas tij, qeveria turke në krye me Rexhep Taip Erdoganin në vazhdimësi investojnë për këtë shtet, ndërsa asnjëri nga përfaqësuesit politik nuk u solidarizua me protestuesit pranë ambasadës turke në Maqedoni.
“Për Taip Erdoganin kjo që kemi bërë ne është shumë pak në krahasim me atë që ai ka bërë për Maqedoninë, e në veçanti për myslimanët në këtë vend. E si ia kthyen atij politikanët tanë, nuk u lodhën qoftë edhe dy fjalë t’i thonë si shenjë solidarizimi e lëre të na bashkangjiten pranë ambasadës. Këtu e përfshij edhe Bashkësinë Fetare Islame së bashku me shumicën e organizatat joqeveritare që financat i sigurojnë pikërisht nga Turqia”, shtoi Shakiri.
Në vazhdim, Ertani tregon se si është informuar dhe ka përcjellë lajmet deri në orët e mëngjesit për ndodhitë në Turqi.
“U shqetësova shumë kur e kuptova se ushtria është ngritur kundër qeverisë. Nuk e kuptoja çka po ndodh me Turqinë. Mediat vetëm spekulonin me informata të ndryshme, zemra më digjeshte për çdo viktimë që binte. Kështu e kalova natën pranë televizorit deri sa thirri ezani për faljen e sabahut”, përfundoi rrëfimin e tij Ertan Shakiri.
Ndryshe kujtojmë se Ertan Shakiri ka disa përjetime të bukura me liderin turk, Rexhep Taip Erdogan, prej së cilit ka dhuratë një karrocë digitale, por dhe një vend pune. /tesheshi.com/
