Nga Mensur Krasniqi
Nuk thuhet më kot që “për t’ia ditur vlerën ndonjë gjëje duhet që ta humbisni njëherë atë”. Kështu, si çdo qytet që mund të ballafaqohet me probleme të natyrave të ndryshme, bile bile edhe të skamjes së ujit, ashtu edhe siç ballafaqohen shumë vende në globin tonë, siç janë shtete të tëra në kontinentin e Afrikës, një gjë e tillë sot e ka goditur edhe qytetin e Shkupit.
Siç informuan nga NP Ujësjellësi dhe Kanalizimi – Shkup, për portalin tesheshi.com ndërprerja e ujit është për shkak të vendosjes të kyçësit në një stacion të ri të pompës në Shuto Orizarë. Ndërsa pa ujë që nga orët e vona të natës së djeshme e deri në ora 22:00 do të mbeten shfrytëzuesit nga Bardovci, Vizbegu dhe zona industriale Rruga e Kaçanikut, Shuto Orizare, Butel 1, Butel 2, lagjja dhe fshati Radishan, Kuçeviçka Bara, Çairi, Shkup-Veri, Kazerma Ilinden, Fusha e Tophanës, zona e lartë e Kalasë, zona e lartë e Gazi Babës, lagjja Hekuranë, shfrytëzuesit industrial në rrethin e minierave dhe hekurudha dhe zona e lartë në Autokomandë.
Në këto zona sipas NP Ujësjellësi dhe Kanalizimi-Shkup tashmë janë siguruar katër cisterna për ujë vetëm për nevojat e qytetarëve.
Sipas ambientalistit Afrim Osmani, kjo dukuri sa i ka anët e shumta negative, e ka së paku edhe një pozitive, solidarizimi me popullatën që ballafaqohen me këtë problem çdo ditë.
“Mungesa e ujit gjatë ditës së sotme do ti shkaktoj shumë probleme popullatës së Shkupit, kurse këtë gjendje ende më tepër do ta vështirësoj temperaturat e larta, për çka edhe trupit të njeriut i nevojitet sa më tepër ujë dhe lëngje për konsumim. Mungesa e ujit, para se gjithash dot shkaktojë probleme shëndetësore ndaj personave me sëmundje kronike, ndaj punëtorëve që gjatë tërë ditës janë në kryerje të punëve fizike, bujqve, mosujitja e tokës bujqësore dhe shtresave tjera të shoqërisë, ku vjen në shprehje përdorimi i ujit. Madje, mungesa e ujit dot shkaktojë pasoja edhe në funksionimin normal të shumë institucioneve shtetërore, si dhe të shkollave, në veçanti atyre fillore dhe të mesme, ashtu edhe siç janë paralajmëruar mospunimi i shkollave të shumta në qytetin e Shkupit. Ajo çka është pozitive në këtë drejtim, është solidarizimi me ato vende që çdo ditë ballafaqohen me këtë problematikë, si dhe ana tjetër pozitive është ajo se, kjo gjendje falë Zotit dot zgjas vetëm një ditë, e jo më shumë”, deklaroi për portalin tesheshi.com, ambientalisti Afrim Osmani.
Edhe pse institucionet përkatëse kanë paralajmëruar se gjatë tërë ditës do të jenë në qarkullim çisterna të mbushura plotë me ujë, kjo sipas Osmanit nuk do të jetë zgjidhje e plotë, por parciale. Osmani në vazhdim përmendi edhe pasojat e mungesës së ujit ndaj mjedisit jetësor.
“Çka nëse kjo ditë na shpeshtohet, pra na paraqiten raste të njëjta, me skamje të ujit, kjo d.m.th kolaps i tërë qytetit. Nuk mundem pa përmendur edhe pasojat ekologjike, me çka si rezultat i ndërprerjes së ujit nuk mund të mbrohet në mënyrë të mirëfilltë mjedisi jetësor, ujitja e pemëve dhe gjelbërimeve, parqeve dhe larja e asfalteve në këtë kohë të nxehtë, me çka drejtpërdrejtë dot ndikon negativisht në rëndimin e ajrit, kurse kjo drejtpërdrejtë ndikon edhe në frymëmarrjen me probleme. Nëse i numërojmë pasojat dhe problemet që mund të paraqiten si rezultat i skamjes së ujit, do të nevojitet shumë kohë dhe shumë për të shkruar”, përfundoi Osmani. /tesheshi.com/
