Sapo në parlamentin maqedonas nisën diskutimet mbi ndryshimet kushtetuese në zbatim të marrëveshjes mes Shkupit dhe Athinës për emrin e ri, nga Brukseli ka shkuar një mesazh në drejtim të kryeqytetit maqedonas, i cili më së shumti i drejtohet opozitës.
Është Federica Mogherini ajo e cila kërkon që Marrëveshja e Prespës të mos përfundojë në kosh, kjo pasi mazhoranca nuk i ka numrat e nevojshëm për miratimin e ndryshimeve kushtetuese, e rrjedhimisht mbylljen njëherë e mirë të çështjes së emrit.
“Kjo është një marrëveshje historike, e përshëndetur nga e gjithë Europa dhe mund sjellë ndryshime të mëdha në të gjithë rajonin e Ballkanit Perëndimor”, theksoi Mogherini, duke kërkuar që politika të mos i bëhet pengesë.
“Shpresoj që të gjithë aktorët politikë të kuptojnë rëndësinë dhe garantojnë një të ardhme të vendit në BE, një të ardhme që i gjithë vendi prej vitesh shpreson se do të bëhet realitet”, tha gruaja në krye të diplomacisë së Brukselit.
Faktori ndërkombëtar, i cili u investua aq fuqishëm për referendumin, por pa marrë rezultatin që dëshironte, tashmë është në ankthin e dështimit të mundshëm të marrëveshjes, nëse ajo nuk zgjidhet në parlament. Zgjedhjet e parakokshme nuk do ishin garanci se mazhoranca aktuale, do mund të siguronte sërish numrat e nevojshëm për ta përfunduar marrëveshjen në terma kushtetues. /tesheshi.com/
